കരുനാഗപ്പള്ളി : കരുനാഗപ്പള്ളി താലൂക്ക് ആശുപത്രിയിൽ ആരംഭിച്ച തൈറോയ്സ് യൂണിറ്റിന്റെ ഉദ്ഘാടനം ആർ. രാമചന്ദ്രൻ എം.എൽ.എ നിർവഹിച്ചു. ചടങ്ങിൽ ആരോഗ്യ സ്റ്റാൻഡിംഗ് കമ്മിറ്റി ചെയർപേഴ്സൺ സുബൈദ കുഞ്ഞുമോൻ അദ്ധ്യക്ഷത വഹിച്ചു. നഗരസഭാ വൈസ് ചെയർമാൻ ആർ. രവീന്ദ്രൻ പിള്ള, സ്ഥിരം സമിതി അദ്ധ്യക്ഷരായ വസുമതി രാധാകൃഷ്ണൻ, സുരേഷ് പനക്കുളങ്ങര, എം. മഞ്ജു, പ്രതിപക്ഷ പാർലമെന്ററി പാർട്ടി ലീഡർ എം. കെ. വിജയഭാനു, ആശുപത്രി സൂപ്രണ്ട് ഡോ. തോമസ് അൽഫോൺസ്, ലേ സെക്രട്ടറി സിന്ധു, നഗരസഭാ കൗൺസിലർമാർ എന്നിവർ പങ്കെടുത്തു. കാഴ്ച പരിശോധനയ്ക്കായുള്ള ഒഫ്താൽമോളജി യൂണിറ്റിലെ എൽ. ഇ. ഡി സ്ക്രീനും ഇതോടൊപ്പം ഉദ്ഘാടനം ചെയ്തു. നഗരസഭയുടെ വാർഷിക പദ്ധതിയിൽ നിന്നനുവദിച്ച 24 ലക്ഷം രൂപാ ഉപയോഗിച്ചാണ് അത്യാധുനിക തൈറോയ്ഡ് മെഷീൻ സ്ഥാപിച്ചത്. സ്വകാര്യ ലാബുകളിൽ 700 രൂപ വരെ ചെലവ് വരുന്ന ടെസ്റ്റുകൾ ഇനി കുറഞ്ഞ നിരക്കിൽ താലൂക്ക് ആശുപത്രിയിൽ ചെയ്യാം. ഗർഭിണികൾക്കും കുട്ടികൾക്കും പരിശോധന സൗജന്യമാണ്. തൈറോയ്ഡ് സംബന്ധമായ ടെസ്റ്റുകൾ കൂടാതെ വിവിധതരം ഹോർമോൺ ടെസ്റ്റുകളും ഇവിടെ നടത്താം. ഗർഭസ്ഥ ശിശുവിന്റെ വൈകല്യങ്ങൾ, ഹൃദ്രോഗം, എയിഡ്സ് തുടങ്ങിയ രോഗങ്ങളും മുൻകൂട്ടി തിരിച്ചറിയാൻ കഴിയുന്ന 'അബോട്ട് ' എന്ന പേരിലുള്ള ആധുനിക മെഷീനാണ് ഇവിടെ സ്ഥാപിച്ചത്. തൈറോയ്ഡ് മെഷീന്റെ പ്രവർത്തനത്തിനായി എച്ച്.എം.സിയിൽ നിന്നും ലാബ് ടെക്‌നീഷ്യനെയും നിയമിച്ചു.