കൊട്ടാരക്കര: എം.സി.റോഡിൽ മൈലം മുട്ടമ്പലത്ത് കാറും ഓട്ടോയും കൂട്ടിയിടിച്ച് ഓട്ടോ ഡ്രൈവർക്ക് ദാരുണാന്ത്യം. മൈലം ജംഗ്ഷനിലെ ഓട്ടോസ്റ്റാന്റിലെ ഡ്രൈവർ ആക്കവിള പല്ലിതെക്കേതിൽ ഷിബുവാണ് (28)മരിച്ചത്. ഓട്ടോയിലുണ്ടായിരുന്ന ആക്കവിള ജയലക്ഷ്മി ബേക്കറി ഉടമ മോഹനൻപിള്ളയെ (48) ഗുരുതര പരിക്കുകളോടെ തിരുവനന്തപുരം മെഡിക്കൽ കോളേജാശുപത്രിയിൽ പ്രവേശിപ്പിച്ചു. ഇന്നലെ ഉച്ചയ്ക്ക് ഒരുമണിയോടെ മുട്ടമ്പലം ജംഗ് ഷനിലായിരുന്നു അപകടം. ആലപ്പുഴ നിന്നും കൊട്ടാരക്കര ഭാഗത്തേക്കു വരികയായിരുന്ന കാർ എതിരെ വന്ന ഓട്ടോ യിൽ ഇടിക്കുകയായിരുന്നു. പൂർണ്ണമായും തകർന്ന ഓട്ടോയിലെ ഒടിഞ്ഞു മടങ്ങിയ കമ്പികൾക്കിടയിൽ ഷിബു കുരുങ്ങി. കൊട്ടാരക്കര നിന്നും ഫയർഫോഴ്സ് എത്തി ശ്രമകരമായാണ് കമ്പികൾ മുറിച്ചു മാറ്റി പുറത്തെടുത്തത്. അപ്പോഴേക്കും മരിച്ചിരുന്നു. ഭാര്യ: ചിഞ്ചു. അമ്മ: മോനി, അച്ഛൻ ജോസഫ്. മൃതദേഹം കൊട്ടാരക്കര താലൂക്ക് ആശുപത്രിയിൽ പോസ്റ്റുമോർട്ടത്തിന് ശേഷം ബന്ധുക്കൾക്ക് വിട്ടുകൊടുത്തു.