തഴവ : നിരന്തരമായ സമര പോരാട്ടങ്ങളിലൂടെയാണ് ഇടതുപക്ഷ പ്രസ്ഥാനം വളർന്നു വന്നതെന്ന് മന്ത്രി ജി. സുധാകരൻ പറഞ്ഞു. സി.പി.എം തഴവ ലോക്കൽ കമ്മിറ്റിയുടെ ആഭിമുഖ്യത്തിൽ സംഘടിപ്പിച്ച പി. ഉണ്ണിക്കൃഷ്ണൻ അനുസ്മരണ യോഗം ഉദ്ഘാടനം ചെയ്യുകയായിരുന്നു അദ്ദേഹം. പ്രപഞ്ച നിയമങ്ങൾ പോലെ ശാസ്ത്രീയവും നിബന്ധിതവുമാണ് മാർക്സിസം. അതു കൊണ്ടുതന്നെ സൂക്ഷ്മമായ സാമൂഹ്യ പഠനങ്ങളിലൂടെ മാത്രമേ ഇത് പ്രായോഗികമാക്കാൻ കഴിയൂ. അപക്വവും അശാസ്ത്രീയവുമായ ഇടപെടലുകൾ നടത്തുമ്പോൾ തിരിച്ചടിയുണ്ടാകുന്നത് സ്വാഭാവികമാണ്. അതിനെ പ്രത്യയ ശാസ്ത്രത്തിന്റെ പോരായ്മയായി കാണരുത്. മനുഷ്യനന്മയ്ക്കു വേണ്ടി നടത്തിയ നിരന്തര പോരാട്ടത്തിന്റെ ചരിത്രമാണ് ഇടതുപക്ഷ പ്രസ്ഥാനത്തിന്റെ ചരിത്രമെന്നും മന്ത്രി വ്യക്തമാക്കി. എ.എം. ആരിഫ് എം.പി മുഖ്യപ്രഭാഷണം നടത്തി. എം. ശിവശങ്കരപ്പിള്ള, എം. ഗംഗാധരക്കുറുപ്പ്, പി.ബി. സത്യദേവൻ, പി.കെ. അനിൽ, ആർ. അമ്പിളിക്കുട്ടൻ, സൂര്യ സുരേന്ദ്രൻ, സുരേഷ് എന്നിവർ സംസാരിച്ചു. യോഗത്തിൽ ഡി. എബ്രഹാം അദ്ധ്യക്ഷത വഹിച്ചു.