പടിഞ്ഞാറേ കല്ലട: മഹാത്മാഗാന്ധിയുടെ 150 -ാം ജന്മവാർഷികത്തിന്റെ ഭാഗമായി പടിഞ്ഞാറേ കല്ലട ഗവ. ഹയർ സെക്കൻഡറി സ്കൂളിലെ എൻ.എസ്.എസ് യൂണിറ്റ് പൊതുജന വായനാ പദ്ധതിയുടെ ഭാഗമായി ശാസ്താംകോട്ട റെയിൽവേ സ്റ്റേഷനിൽ തുറന്ന വായനശാല ആരംഭിച്ചു. റെയിൽവേ സ്റ്റേഷനിൽ എത്തുന്ന യാത്രക്കാർക്ക് സൗജന്യമായി ഇവിടെ നിന്ന് പുസ്തകങ്ങൾ വായിച്ച ശേഷം തിരികെ ഏൽപ്പിക്കാവുന്നതാണ്. സ്കൂൾ പ്രിൻസിപ്പൽ പി.എം. സജിതയിൽ നിന്ന് പുസ്തകങ്ങൾ ഏറ്റുവാങ്ങി റെയിൽവേ സ്റ്റേഷൻ മാസ്റ്റർ പ്രമോദ് കുമാർ പദ്ധതി ഉദ്ഘാടനം ചെയ്തു. എൻ.എസ്.എസ് പ്രോഗ്രാം ഓഫീസർ വിനീത് മോഹൻ പണിക്കർ സ്വാഗതം പറഞ്ഞു. ടീച്ചർമാരായ ഹരികുമാർ, ഡോ. ജയശ്രീ എന്നിവർ സംസാരിച്ചു.