കയ്പ്പമംഗലം: സംസ്ഥാന സർക്കാരിന്റെ ആർദ്രം പദ്ധതി പ്രകാരം കയ്പ്പമംഗലം പ്രാഥമികാരോഗ്യ കേന്ദ്രത്തിൽ സായാഹ്ന ഒ.പി ആരംഭിച്ചു. ഞായറാഴ്ച ഒഴികെ ആഴ്ചയിൽ ആറ് ദിവസവും ഉച്ചയ്ക്ക് 1 മുതൽ 5 വരെ സായാഹ്ന ഒ.പി പ്രവർത്തിക്കും. കയ്പ്പമംഗലം പഞ്ചായത്തിന്റെ പദ്ധതിയിൽ ഉൾപ്പെടുത്തിയാണ് ഒരു ഡോക്ടറെയും ഒരു സ്റ്റാഫ് നഴ്‌സിനെയും നിയമിച്ചിരിക്കുന്നത്. പഞ്ചായത്ത് പ്രസിഡന്റ് ടി.വി സുരേഷ് സായാഹ്ന ഒ.പിയുടെ ഉദ്ഘാടനം നിർവഹിച്ചു. വൈസ് പ്രസിഡന്റ് ഖദീജ പുതിയ വീട്ടിൽ അദ്ധ്യക്ഷത വഹിച്ചു. ആരോഗ്യ വിദ്യാഭ്യാസ സ്റ്റാൻഡിംഗ് കമ്മിറ്റി ചെയർപേഴ്‌സൺ അജീഷ നവാസ്, പഞ്ചായത്തംഗങ്ങളായ പി.എ സജീർ, കെ.എ സൈനുദ്ദീൻ, അഖില വേണി, ജിസ്‌നി ഷാജി, ഫൗസിയ ഷെമീർ തുടങ്ങിയവർ സംസാരിച്ചു.