തൃശൂർ: കോർപറേഷന്റെ ആഭിമുഖ്യത്തിൽ സംഘടിപ്പിക്കുന്ന ഹാപ്പി ഡേയ്‌സ് രാത്രികാല ഷോപ്പിംഗ് ഉത്സവത്തിന്റെ പ്രാരംഭ പ്രവർത്തനങ്ങൾക്ക് തുടക്കം. നഗരഹൃദയത്തിൽ പത്ത് ലൈറ്റിംഗ് പന്തലുകൾ ഉയർന്നു. മണികണ്ഠനാലിന് സമീപവും സി.എം.എസ് സ്‌കൂൾ, സപ്ന തിയേറ്റർ, ജനറൽ ആശുപത്രി, സിറ്റി സെന്റർ, ബാനർജി ക്ലബ്, കല്യാൺ ജ്വല്ലേഴ്സ്, മിഥില റസ്റ്റൊറന്റ് എന്നിവയുടെ പരിസരങ്ങളിലുമാണ് പന്തലുകൾ ഉയർന്നത്. ജില്ലയിൽ ആദ്യമായി നടക്കുന്ന ഷോപ്പിംഗ് ഉത്സവം ഭിന്നശേഷി സൗഹൃദമാക്കാനാണ് തീരുമാനമെന്ന് തൃശൂർ കോർപറേഷൻ മേയർ അജിത വിജയൻ, ഫെസ്റ്റിവൽ കമ്മിറ്റി ജനറൽ കൺവീനർ ടി.എസ് പട്ടാഭിരാമൻ എന്നിവർ പത്രസമ്മേളനത്തിൽ അറിയിച്ചു.

ചേംബർ ഒഫ് കോമേഴ്‌സിന്റെ സഹകരണത്തോടെ നടക്കുന്ന ഷോപ്പിംഗ് ഉത്സവത്തിൽ വീൽ ചെയറിൽ എത്തുന്നവർക്ക് യാത്ര ചെയ്യാനായി പ്രത്യേക വാഹന സൗകര്യമൊരുക്കും. കേരളത്തിൽ ആദ്യമായി നടക്കുന്ന പരിപാടിയിൽ ഇതര ജില്ലകളിൽ നിന്നുൾപ്പെടെ 2 കോടിയിലധികം ആളുകളെയാണ് പ്രതീക്ഷിക്കുന്നത്.

മനോഹരമായ വൈദ്യുതാലങ്കാരത്തോടെ നഗരവീഥികളും വ്യാപാര സ്ഥാപനങ്ങളും രാത്രി 11 മണി വരെ ഒരു മാസക്കാലം തുറന്നിരിക്കും. ഡിസംബർ 15 മുതൽ ജനുവരി 15 വരെ എല്ലാ ദിവസങ്ങളിലും കലാപരിപാടികളുണ്ടാകും. നഗരവീഥികളിൽ ചലിക്കുന്ന വേദികളിൽ പുതുമയുള്ള കലാപരിപാടികൾ അവതരിപ്പിക്കും. മാരത്തോൺ, വിന്റേജ് കാർ റാലി, റോളർ സ്‌കേറ്റിംഗ്, എൻഫീൽഡ് ഹാർലി റാലി, പെറ്റ് ഷോ, ഫ്ലാഷ് മോബ്, മാർഗം കളി, ചിത്ര രചനാ മത്സരം, നാടൻ പാട്ട്, ഫാഷൻ ഷോ, കേരള പാരമ്പര്യ കലകൾ, സുംബ, സ്ട്രീറ്റ് പെയിന്റിംഗ്, യാത്ര പ്രദർശനം, പാലസ് ഗ്രൗണ്ടിൽ പെനാൽറ്റി ഷൂട്ട് ഔട്ട്, പുഴക്കലിൽ മഡ് റേസ്, വഞ്ചിക്കുളത്ത് ലേസർ സൗണ്ട് ഷോ എന്നിവയുമുണ്ടാകും. വഞ്ചിക്കുളത്ത് സ്ത്രീകൾക്ക് മാത്രമായി ഡി.ജെ ഫ്‌ളോറും, കുടുംബശ്രീ ഭക്ഷ്യ മേളയും ഒരുക്കും. വയോധികർക്ക് ഗാനാലാപന മത്സരവും, ഷോപ്പിംഗ് നടത്തുന്നവർക്ക് കൂപ്പണുകളിലൂടെ 5 കാർ, 5 ബൈക്ക്, ടി വി, ഫ്രിഡ്ജ് എന്നിവ സമ്മാനമായി നൽകും. ശബരിമല തീർത്ഥാടകരെ സ്വീകരിച്ച് വിശ്രമ സ്ഥലം, ചായ ഉൾപ്പെടെ ഒരുക്കും. ശക്തൻനഗറിലും, കിഴക്കേകോട്ടയിലും കുടിവെള്ളം, ഇ ടോയ്ലറ്റ് എന്നിവ സജ്ജമാക്കും.

തേക്കിൻകാട് മൈതാനം വേദിയാകില്ല

തേക്കിൻകാ‌ട് മൈതാനം വേദിയാക്കുകയോ തൃശൂർ പൂരത്തിൻ്റെ പ്രൗഢി കുറയ്ക്കുകയോ ചെയ്യുന്നതല്ല ഷോപ്പിംഗ് ഉത്സവമെന്ന് സംഘാടകർ അറിയിച്ചു. ഇത് സംബന്ധിച്ച ആശങ്കകൾക്ക് അടിസ്ഥാനമില്ല. ഇതേസമയം തൃശൂരിൽ നടക്കുന്ന തിരുവമ്പാടി, പാറമേക്കാവ് വേലകൾ, വടക്കുംനാഥനിൽ നടക്കുന്ന മെഗാ തിരുവാതിരകളി, ബോൺ നതാലെ എന്നിവയും ആകർഷകമായി നടക്കും. പുതുവത്സരത്തിൻ്റെ ഭാഗമായി സ്റ്റീഫൻ ദേവസ്സിയുടെ സംഗീത പരിപാടികളുണ്ടാവും. ഡെപ്യൂട്ടി മേയർ റാഫി പി. ജോസ്, ചേംബർ ഒഫ് കോമേഴ്‌സ് പ്രസിഡന്റ് ടി.ആർ വിജയകുമാർ, കേരള വ്യാപാരി വ്യവസായി ഏകോപന സമിതി ജില്ലാ സെക്രട്ടറി പി.ജെ പയസ് എന്നിവരും പത്രസമ്മേളനത്തിൽ പങ്കെടുത്തു.