ചാവക്കാട്: നഗരസഭാ ബസ് സ്റ്റാൻഡിനോട് ചേർന്ന് നഗരസഭ നിർമിച്ച വിശാലമായ ചത്വരത്തിന് കൂട്ടുങ്ങൽ ചത്വരമെന്ന് നാമകരണം ചെയ്യുന്നതിന്റെയും കവാടത്തിന്റെയും ഉദ്ഘാടനം ദേവസ്വം മന്ത്രി കടകംപള്ളി സുരേന്ദ്രൻ നിർവ്വഹിച്ചു. ചാവക്കാട് നഗരസഭയിലെ വനിതകളുടെ ഗൃഹനിർമാണ യൂണിറ്റായ ''ഗൃഹശ്രീ'' നിർമാണം പൂർത്തീകരിച്ച ആദ്യ ഭവനത്തിന്റെ താക്കോൽദാനവും ഗൃഹശ്രീ യൂണിറ്റിന്റെ സഹകരണത്തോടെ നഗരസഭ നിർമിച്ച് നൽകുന്ന ഭവന നിർമാണ പ്രവർത്തനങ്ങളുടെ ഉദ്ഘാടനവും ഇതോടൊപ്പം മന്ത്രി നിർവ്വഹിച്ചു. ചടങ്ങിൽ കെ.വി. അബ്ദുൽ ഖാദർ എം.എൽ.എ അദ്ധ്യക്ഷനായി.

പി.എം.എ.വൈ ഭവനനിർമാണം പൂർത്തീകരിച്ച 390 പേർക്ക് സ്വച്ഛ് ഭാരത് അർബൻ ഖരമാലിന്യ സംസ്‌ക്കരണ പദ്ധതിപ്രകാരം നൽകുന്ന മാലിന്യസംസ്‌ക്കരണ ഉപാധികളുടെ വിതരണം,മാലിന്യശേഖരണത്തിനായി നഗരസഭയിലെ ഹരിത കർമ്മ സേനക്കുള്ള വാഹനത്തിന്റെ താക്കോൽദാനം എന്നിവയും നടന്നു.ചാവക്കാട് നഗരസഭാ ചെയർമാൻ എൻ.കെ. അക്ബർ, വൈസ് ചെയർപേഴ്‌സൺ മഞ്ജുഷ സുരേഷ്, നഗരസഭാ വിവിധ സ്റ്റാൻഡിംഗ് കമ്മിറ്റി അദ്ധ്യക്ഷരായ കെ.എച്ച്. സലാം, എം.ബി. രാജലക്ഷ്മി, സഫൂറ ബക്കർ, എ.എ. മഹേന്ദ്രൻ, എ.സി. ആനന്ദൻ, സി.പി.എം ഏരിയ സെക്രട്ടറി എം. കൃഷ്ണദാസ്, വി. സിദ്ദിക്ക് ഹാജി, പി.കെ. സൈതാലികുട്ടി, ലാസർ പേരകം, പ്രീജ ദേവദാസ്, നഗരസഭാ സെക്രട്ടറി കെ.ബി. വിശ്വനാഥൻ തുടങ്ങിയവർ സംസാരിച്ചു.