സിവിൽ സർവീസ്: ന്യൂനപക്ഷ വിദ്യാർത്ഥികൾക്ക് ഫീസ് റീഇംബേഴ്സ്‌മെന്റ്
അഖിലേന്ത്യാ സിവിൽ സർവീസ് പരീക്ഷയ്ക്ക് തയ്യാറെടുക്കുന്ന മുസ്ലീം, ക്രിസ്ത്യൻ, ബുദ്ധ, സിഖ്, പാഴ്സി, ജൈനർ ന്യൂനപക്ഷ മത വിഭാഗങ്ങളിൽപ്പെടുന്നവർക്ക് സംസ്ഥാന ന്യൂനപക്ഷക്ഷേമ വകുപ്പ് കോഴ്സ് ഫീസും, ഹോസ്റ്റൽ ഫീസും റീ ഇംബേഴ്സ് ചെയ്യുന്ന പദ്ധതിയിലേക്ക് അപേക്ഷിക്കാം. കോഴ്സ് ഫീസായി പരമാവധി 20,000 രൂപയും ഹോസ്റ്റൽ ഫീസായി പരമാവധി 10,000 രൂപയുമാണ് നൽകുന്നത്. അപേക്ഷകർ കേരള സിവിൽ സർവീസ് അക്കാഡമി, ഇൻസ്റ്റിറ്റ്യൂട്ട് ഒഫ് കരിയർ റിസർച്ച്‌ പൊന്നാനി, യൂണിവേഴ്സിറ്റികൾ നടത്തുന്ന പരിശീലന കേന്ദ്രങ്ങൾ തുടങ്ങിയ സ്ഥാപനങ്ങളിൽ സിവിൽ സർവീസ് പരിശീലനം നടത്തുന്നവരും നോൺ ക്രിമിലെയർ പരിധിയിൽ ഉൾപ്പെടുന്നവരുമായിരിക്കണം. വിദ്യാർത്ഥി പഠിക്കുന്ന സ്ഥാപനം നേരിട്ടു നടത്തുന്ന ഹോസ്റ്റലുകളിലും, സ്ഥാപന മേധാവി അംഗീകരിച്ചിട്ടുളള സ്വകാര്യ ഹോസ്റ്റലുകളിൽ നിന്ന് പഠിക്കുന്നവർക്കും ഹോസ്റ്റൽ സ്റ്റൈപ്പന്റിന് അപേക്ഷിക്കാം. ഫീസ് അടച്ചതിന്റെ അസൽ രസീതിൽ വിദ്യാർത്ഥി പഠിക്കുന്ന സ്ഥാപനത്തിന്റെ മേധാവിയുടെ മേലൊപ്പ് പതിക്കണം. അപേക്ഷകരുടെ വാർഷിക വരുമാനം എട്ട് ലക്ഷം രൂപയിൽ കവിയരുത്. ബി.പി.എൽ വിഭാഗത്തിൽപ്പെടുന്ന അപേക്ഷകർക്ക് മുൻഗണന നൽകും. 80 ശതമാനം ആനുകൂല്യം മുസ്ലിം വിദ്യാർത്ഥികൾക്കും, 20 ശതമാനം ന്യൂനപക്ഷ മതവിഭാഗങ്ങളിൽപ്പെടുന്നവർക്കുമായിരിക്കും. അപേക്ഷകർക്ക് ഏതെങ്കിലും ദേശസാത്കൃത ബാങ്കിൽ അക്കൗണ്ട് ഉണ്ടാവണം. www.minoritywelfare.kerala.gov.in ലൂടെ ഓൺലൈനായി അപേക്ഷിക്കാം. 21 നകം ലഭിക്കണം.ഫോൺ- 0471 2300524.

പരീക്ഷ കേന്ദ്രങ്ങളിൽ മാറ്റം
2019 ലെ പത്താംതര തുല്യതാപരീക്ഷയുടെ പരീക്ഷാകേന്ദ്രങ്ങളിൽ പത്തിൽ താഴെ പരീക്ഷാർത്ഥികൾ രജിസ്റ്റർ ചെയ്തവ റദ്ദാക്കി. ഈ സെന്ററുകളിൽ രജിസ്റ്റർ ചെയ്തവരെ അടുത്തുളള പരീക്ഷാസെന്ററുകളിലേക്ക് മാറ്റിയിട്ടുണ്ട്. വിശദവിവരങ്ങൾ www.keralapareekshabhavan.in ൽ ലഭിക്കും.