നെടുമങ്ങാട്: പ്രമുഖ പുസ്തക പ്രസാധകർ പങ്കെടുക്കുന്ന കോയിക്കൽ പുസ്തകോത്സവം 21 മുതൽ 24 വരെ നെടുമങ്ങാട് ടൗൺ എൽ.പി.എസിൽ നടക്കും. കലാപരിപാടികൾ, സെമിനാറുകൾ, സംവാദം, കവി സമ്മേളനം, ഫുഡ്‌ഫെസ്റ്റിവൽ, പ്രതിഭാസംഗമം എന്നിവ അരങ്ങേറുമെന്ന് സംഘാടകസമിതി ചെയർമാൻ അഡ്വ.ആർ. ജയദേവൻ, ജനറൽ കൺവീനർ ഷിജൂഖാൻ, പ്രോഗ്രാം കൺവീനർ കെ.പി. പ്രമോഷ് എന്നിവർ വാർത്താ സമ്മേളനത്തിൽ അറിയിച്ചു. സി. ദിവാകരൻ എം.എൽ.എയുടെ അദ്ധ്യക്ഷതയിൽ സാഹിത്യകാരൻ പെരുമാൾ മുരുകൻ ഉദ്‌ഘാടനം ചെയ്യും. ഏഴാച്ചേരി രാമചന്ദ്രൻ, മുരുകൻ കാട്ടാക്കട, ഗിരീഷ് പുലിയൂർ, വിനോദ് വൈശാഖി തുടങ്ങിയവർ സംസാരിക്കും. 22 ന് വൈകിട്ട് മാദ്ധ്യമ സെമിനാറിൽ എൻ.പി. ചന്ദ്രശേഖരൻ, ഇ. സനീഷ്‌, അഭിലാഷ് മോഹൻ, അപർണ സെൻ, വിധു വിൻസന്റ്, സി.പി. അജിത എന്നിവർ പങ്കെടുക്കും. നെടുമങ്ങാട് താലൂക്കിലെ മുതിർന്ന പത്രപ്രവർത്തകരായ എം.ബി. ദിവാകരനെയും ആനാട് ശശിയേയും ആദരിക്കും. 23ന് എഴുത്തുകാരുടെ കൂട്ടായ്മ മന്ത്രി കടകംപള്ളി സുരേന്ദ്രൻ ഉദ്‌ഘാടനം ചെയ്യും. പിരപ്പൻകോട് മുരളി മുഖ്യപ്രഭാഷണം നടത്തും. 24 ന് വൈകിട്ട് ഇന്ത്യൻ ജനാധിപത്യം എന്ന വിഷയത്തെ ആസ്പദമാക്കി സെമിനാർ മന്ത്രി കെ.ടി. ജലീൽ ഉദ്‌ഘാടനം ചെയ്യും. കുരീപ്പുഴ ശ്രീകുമാർ മുഖ്യപ്രഭാഷണം നടത്തും. ജില്ലാപഞ്ചായത്ത് പ്രസിഡന്റ് വി.കെ. മധു മോഡറേറ്ററാവും. പത്രസമ്മേളനത്തിൽ എഴുത്തുകാരൻ പി.കെ. സുധിയും പങ്കെടുത്തു.