പാലോട്: ജില്ലാതല കേരളോത്സവത്തെ വരവേൽക്കാൻ പാലോട് ഒരുങ്ങി.ഇന്ന് രാവിലെ 8ന് പ്രധാന വേദിയിൽ ജില്ലാ പഞ്ചായത്ത് പ്രസിഡന്റ് വി.കെ.മധു പതാക ഉയർത്തുന്നതോടെ മത്സരങ്ങൾക്ക് തുടക്കമാകും.പാലോട് സിറ്റി സെന്റർ ഗ്രൗണ്ടിൽ പുരുഷ, വനിത വോളിബാൾ മത്സരങ്ങളും കാര്യവട്ടം എൽ.എൻ.സി.പി.ഇ ഗ്രൗണ്ടിൽ അതലറ്റിക് മത്സരങ്ങളും നടക്കും.കാര്യവട്ടത്ത് മേയർ കെ.ശ്രീകുമാർ ഫ്ലാഗ് ഓഫ് ചെയ്യും.16 ന് വൈകിട്ട് 4ന് സമാപന സമ്മേളനം മന്ത്രി ജെ. മേഴ്സിക്കുട്ടിയമ്മ ഉദ്ഘാടനം ചെയ്യും.അടൂർ പ്രകാശ് എം.പി, ഡി.കെ. മുരളി എം.എൽ.എ എന്നിവർ സമ്മാനദാനം നിർവഹിക്കും. സമ്മേളനത്തിന് മുന്നോടിയായി പാലോട് ആശുപത്രി ജംഗ്ഷനിൽ നിന്ന് പ്രധാന വേദിയിലേക്ക് കുടുംബശ്രീ അംഗങ്ങളും വിവിധ കലാകായിക സംഘടനകളും അണിനിരക്കുന്ന വർണാഭമായ ഘോഷയാത്ര നടക്കും.ഗതാഗത ക്രമീകരണത്തിനും വാഹന പാർക്കിംഗിനും ആവശ്യമായ നടപടികൾ സ്വീകരിച്ചതായി സ്വാഗതസംഘം ജനറൽ കൺവീനർ എ.എം അൻസാരി അറിയിച്ചു.

15 വേദികൾ

മൂവായിരത്തോളം പ്രതിഭകൾ മാറ്റുരക്കുന്ന കലാ-കായിക മാമാങ്കത്തിന് പാലോട്ട് പതിനഞ്ച് വേദികളാണ് സജ്ജമാക്കിയിട്ടുള്ളത്.പെരിങ്ങമ്മല ഇക്ബാൽ കോളേജ് ഗ്രൗണ്ട്, പാലോട് സിറ്റി സെന്റർ, പുലിയൂർ പച്ച ഇൻഡോർ സ്റ്റേഡിയം, പാലോട് മേള ഗ്രൗണ്ട്, ഞാറനീലി അംബേദ്കർ വിദ്യാലയ അങ്കണം, പാലോട് പഞ്ചായത്ത് സ്റ്റേഡിയം,പച്ച അക്വാട്ടിക് സ്റ്റേഡിയം,പാലോട് വേദി ഗ്രന്ഥശാല എന്നിവിടങ്ങളിൽ കായിക മത്സരങ്ങളും, പാലോട് മേള ഗ്രൗണ്ടിലെ പ്രധാന സ്റ്റേഡിയം, ബി.ആർ.സി പേരക്കുഴി, പാലോട് എൽ.പി.എസ്, പാലോട് എ.എ ഓഡിറ്റോറിയം, പാലോട് സഹകരണ ബാങ്ക് ഓഡിറ്റോറിയം എന്നിവിടങ്ങളിൽ കലാമത്സരങ്ങളും നടക്കും.