തിരുവനന്തപുരം: ശ്രീപദ്മനാഭ സ്വാമി ക്ഷേത്രത്തിലെ മുറജപം, ലക്ഷദീപം നടത്തിപ്പുമായി ബന്ധപ്പെട്ട മുന്നൊരുക്കം സംബന്ധിച്ച് മന്ത്രി കടകംപള്ളി സുരേന്ദ്രന്റെ അദ്ധ്യക്ഷതയിൽ അവലോകനയോഗം ചേർന്നു. ഭക്തർക്ക് ആവശ്യമായ സൗകര്യങ്ങളൊരുക്കാനും തിരക്ക് നിയന്ത്രിക്കാനും സുരക്ഷാക്രമീകരണങ്ങളൊരുക്കാനും വിവിധ വകുപ്പുകൾക്ക് യോഗം നിർദേശം നൽകി. ജനുവരി 15നാണ് മുറജപ ആഘോഷങ്ങൾക്ക് സമാപനമാകുന്നതും ലക്ഷദീപം തെളിക്കുന്നതും. ലക്ഷദീപ ദിവസം ശീവേലിദർശനം പാസ് മൂലം നിയന്ത്രിക്കാനും വൈകിട്ട് ആറിന് ശേഷം പാസില്ലാത്ത ഭക്തർക്ക് ബാരിക്കേഡ് ക്രമീകരണത്തിലൂടെ പ്രവേശിച്ച് തിരിച്ചിറങ്ങാനും സൗകര്യമൊരുക്കുമെന്ന് ക്ഷേത്ര എക്സിക്യൂട്ടീവ് ഓഫീസർ അറിയിച്ചു.യോഗത്തിൽ വി.എസ്.ശിവകുമാർ എം.എൽ.എ,ക്ഷേത്ര എക്സിക്യൂട്ടീവ് ഓഫീസർ വി.രതീശൻ,കൗൺസിലർ ആർ.സുരേഷ്,രാജകൊട്ടാരം പ്രതിനിധി ആദിത്യവർമ്മ, പൊലീസ്,റവന്യൂ,വാട്ടർ അതോറിട്ടി,കെ.എസ്.ഇ.ബി ഉൾപ്പെടെ വിവിധ വകുപ്പുകളിലെ ഉദ്യോഗസ്ഥർ എന്നിവർ സംബന്ധിച്ചു.
പ്രവേശന പാസ്
ലക്ഷദീപം ശീവേലി ദർശനത്തിനുള്ള പാസുകൾക്കൾക്ക് ഇന്നു മുതൽ അപേക്ഷിക്കാം
വടക്കേനടയിലെ ഉത്സവമഠം ബിൾഡിംഗിൽ രാവിലെ 10 മുതൽ വൈകിട്ട് 5വരെയാണ് സമയം
ഈ മാസം അവസാനംവരെ അപേക്ഷിക്കാം
ജനുവരി ആദ്യവാരം പാസ് വിതരണം ആരംഭിക്കും
ജനുവരി 15നാണ് മുറജപം ആഘോഷങ്ങൾക്ക് സമാപനം കുറിച്ച് ലക്ഷദീപം തെളിയിക്കുന്നത്
ലക്ഷദീപ ദിവസം ശീവേലിദർശനം പാസ് മൂലം നിയന്ത്രിക്കും
പാസുള്ളവർ വൈകിട്ട് ആറുണിക്ക് മുമ്പേ ക്ഷേത്രത്തിൽ പ്രവേശിക്കണം
പാസില്ലാത്തവർ ആറുമണിക്ക് ശേഷം ബാരിക്കേഡ് ക്രമീകരണത്തിലൂടെ പ്രവേശിച്ച് തിരിച്ചിറങ്ങാനും
യോഗ തീരുമാനം
ഭക്തജനത്തിരക്ക് കണക്കിലെടുത്ത് കൂടുതൽ പൊലീസിനെ വിന്യസിക്കും
സ്‌പെഷ്യൽ ക്യൂവിലൂടെ ഭക്തർക്ക് ക്ഷേത്രത്തിലേക്ക് കടക്കാൻ പൊലീസ് സഹായിക്കും
പാർക്കിംഗ് സൗകര്യമൊരുക്കാൻ 27 സ്ഥലങ്ങൾ
ക്ഷേത്രത്തിനു ചുറ്റുവട്ടത്തെ റോഡുകളുടെ അറ്റകുറ്റപ്പണി എത്രയും വേഗം തീർക്കും
പാർക്കിംഗ് സംവിധാനത്തിന് ക്ഷേത്രത്തിനു ചുറ്റും വകുപ്പിന്റെ അധീനതയിലുള്ള റോഡുകളിലെ ലഭ്യമായ സ്ഥലം ഏർപ്പാടാക്കും
നഗരസഭ പാർക്കിംഗ് സംവിധാനം ക്രമീകരിക്കാൻ ഏകോപനം നടത്തും
ക്ഷേത്രപരിസരത്തെ റോഡുകളിലും നടപ്പാതകളിലും ഉള്ള അനധികൃത കച്ചവടം ഒഴിപ്പിക്കും
പുത്തരിക്കണ്ടം മൈതാനം പാർക്കിംഗിനു ലഭ്യമാക്കും
ക്ഷേത്രനടകളിലുള്ള റോഡുകൾ വഴി ഫയർ എൻജിൻ തടസമില്ലാതെ പോകുന്നതിന് സംവിധാനം
കോട്ടയ്ക്കകം ഉത്സവമേഖലയായി പ്രഖ്യാപിക്കും
കലാസാംസ്‌കാരിക പരിപാടികൾക്ക് എത്തുന്ന കലാകാരന്മാർക്ക് സുരക്ഷ ഉറപ്പാക്കും
ക്ഷേത്രത്തിനു ചുറ്റുവട്ടത്ത് ലക്ഷദീപത്തോടനുബന്ധിച്ചുള്ള ദിവസങ്ങളിൽ കുടിവെള്ളം ലഭ്യമാക്കും
മെഡിക്കൽ ടീമിന്റെയും ആംബുലൻസിന്റെയും സേവനം ആരോഗ്യവകുപ്പ് ലഭ്യമാക്കും
കിഴക്കേനടയിലും കോട്ടയ്ക്കകത്തും മാലിന്യങ്ങൾ നിർമാർജ്ജനം ചെയ്യാൻ നടപടിയെടുക്കും