തിരുവനന്തപുരം: ചപ്പാത്തിയും ചിക്കനും മാത്രമല്ല പൂജപ്പുര ജയിലിൽ ഇനി ബ്യൂട്ടി പാർലറും. ജയിൽ വകുപ്പിന്‍റെ കീഴിൽ പുരുഷൻമാർക്കായി ആരംഭിച്ച 'ഫ്രീഡം ലുക്സ് " എന്ന ബ്യൂട്ടി പാർലറിന്‍റെ ഉദ്ഘാടനം ഡി.ജി.പി ഋഷിരാജ് സിംഗും ആർ ശ്രീലേഖ ഐ.പി.എസും ചേർന്ന് നിർവഹിച്ചു. വിവിധതരം ഫേഷ്യൽ, ഹെയർ ഡ്രസ്സിങ്, ഫേഷ്യൽ മസ്സാജിംഗ്, ഷേവിംഗ്, ഹെന്ന, ഹെയർ കളറംഗ് എന്നിവ ശീതീകരിച്ച റൂമിൽ മിതമായ നിരക്കിൽ ചെയ്ത് നൽകും.
ആദ്യഘട്ടത്തിൽ സേവനം പുരുഷന്മാർക്ക് മാത്രമാണെങ്കിലും വൈകാതെ ലേഡീസ് ബ്യൂട്ടി പാർലറും തുറക്കുമെന്ന് ആർ ശ്രീലേഖ പറഞ്ഞു. പൂജപ്പുര കരമന റോഡിൽ പരീക്ഷ ഭവനോട് ചേർന്നാണ് ഫ്രീഡം ലുക്ക്സ് പാർലർ. രാവിലെ എട്ട് മുതൽ വൈകിട്ട് എട്ട് മണിവരെയാണ് പ്രവർത്തനം.