ഇതാണ് റോബർട്ട്. നാവികന്റേത് പോലുള്ള കുപ്പായമണിഞ്ഞ് കൈയിലൊരു പാവയുമായി ഇരിക്കുന്ന റോബർട്ട് ഒരു പാവയാണെങ്കിലും ആളത്ര പാവമല്ല കേട്ടോ... ഫ്ലോറിഡയിലെ ഈസ്‌റ്റ് മാർട്ടെല്ലോ മ്യൂസിയത്തിൽ ചെന്നാൽ റോബർട്ടിനെ കാണാനാകും. പക്ഷേ, വെറുതെ റോബർട്ടിനെ കണ്ട് മടങ്ങാമെന്ന് കരുതേണ്ട. ആദ്യം റോബർട്ടിന് അഭിവാദ്യമർപ്പിച്ച ശേഷം നമ്മൾ സ്വയം പരിചയപ്പെടുത്തണം. ഫോട്ടോ എടുക്കണമെങ്കിൽ അനുവാദം ചോദിക്കുകയും മടങ്ങാൻ നേരം റോബർട്ടിനോട് യാത്ര പറയുകയും വേണം. ഇതെല്ലാം നിരസിച്ചാലോ..? തന്നോട് അനാദരവ് കാട്ടുന്നവർക്ക് റോബർട്ട് പണി കൊടുക്കുമത്രെ..! അമാനുഷിക കഴിവുകളുള്ള റോബർട്ട് മുഖഭാവം മാറ്റുകയും ചലിക്കുകയും ചിലപ്പോഴൊക്കെ അടക്കി ചിരിക്കുകയും ചെയ്യുമത്രെ.

റോബർട്ട് യൂജീൻ ഓട്ടോ എന്ന ചിത്രകാരന്റേതായിരുന്നു റോബർട്ട് പാവ. ജർമനിയിലെ സ്‌റ്റെയിഫ് കമ്പനിയാണ് ഈ പാവയുടെ നിർമാതാക്കൾ എന്ന് പറയപ്പെടുന്നു. 1904ൽ ഓട്ടോയുടെ മുത്തച്ഛൻ ജർമൻ യാത്രയ്‌ക്കിടെയാണ് റോബർട്ടിനെ വാങ്ങുന്നത്. മുത്തച്ഛൻ ഓട്ടോയുടെ ജന്മദിനത്തിൽ റോബർട്ടിനെ സമ്മാനമായി നൽകുകയായിരുന്നു. അന്ന് മുതൽ റോബർട്ടും ഓട്ടോ കുടുംബത്തിലെ അംഗമായി. കുട്ടിയായിരിക്കെ താൻ ചെയ്‌ത കുറ്റങ്ങളെല്ലാം ഓട്ടോ റോബർട്ടിന്റെ തലയിൽ കെട്ടിവച്ചാതാണ് റോബർട്ടിനെ ഒരു അസാധാരണ പാവയാക്കി മാറ്റിയതെന്നാണ് പൊതുവെ പറയപ്പെടുന്നത്. എന്ത് തെറ്റ് ചെ‌യ്‌താലും അതെല്ലാം ' റോബർട്ട് എന്നോട് ചെയ്യാൻ പറഞ്ഞു ' എന്നാണ് കുട്ടിയായിരിക്കെ ഓട്ടോ പറഞ്ഞിരുന്നത്. വളർന്നപ്പോൾ ഓട്ടോ ചിത്രം വരയ്‌ക്കുമ്പോൾ അരികിൽ റോബർട്ടിനെയും വയ്‌ക്കുമായിരുന്നത്രെ.

1974ൽ ഓട്ടോയുടെ മരണം വരെ ഒപ്പം റോബർട്ടും ഉണ്ടായിരുന്നു. രണ്ടു വർഷത്തിനു ശേഷം ഓട്ടോയുടെ ഭാര്യയും മരിച്ചതോടെ ആ വീടും റോബർട്ട് പാവയും മറ്റ് വസ്‌തുക്കളും മിർറ്റിൽ റോയിട്ടർ എന്നയാൾ വാങ്ങി. പിന്നീട് മറ്റു ചിലർ ഇത് വിലയ്‌ക്ക് വാങ്ങി. ഒടുവിൽ 1994ൽ റോബർട്ട് പാവയെ ഈസ്‌റ്റ് മാർട്ടെല്ലോ മ്യൂസിയത്തിലേക്ക് കൈമാറുകയായിരുന്നു. ഓട്ടോയ്‌ക്ക് ശേഷം കൈവശം വച്ചവരെല്ലാം റോബർട്ട് ഒരു പ്രേതപ്പാവയാണെന്ന് ആരോപിച്ചു. ഏതോ ദുർമന്ത്രവാദിയുടെ കൈയ്യിൽ നിന്നാണ് റോബർട്ട് ഓട്ടോ കുടുംബത്തിൽ എത്തിപ്പെട്ടതെന്നും റോബർട്ട് അസ്വാഭാവിക ശബ്‌ദങ്ങൾ ഉണ്ടാക്കുന്നത് കേട്ടിട്ടുണ്ടെന്നും ഇതിൽ ചിലർ പറയുന്നു.