തിരുവനന്തപുരം: സ്ഥാപനം സാമ്പത്തിക പ്രതിസന്ധിയിലാണെന്ന കാരണംപറഞ്ഞ്‌ ജോലി ചെയ്തതിന്റെ വേതനം കൊടുക്കാതിരിക്കരുതെന്ന് സംസ്ഥാന മനുഷ്യാവകാശ കമ്മിഷൻ അദ്ധ്യക്ഷൻ ജസ്​റ്റിസ് ആന്റണി ഡൊമിനിക് ഉത്തരവിട്ടു.
ഉന്നത വിദ്യാഭ്യാസ വകുപ്പിന് കീഴിൽ പ്രവർത്തിക്കുന്ന സ്വയംഭരണ സ്ഥാപനമായ സി-ആപ്​റ്റിൽ (കേരള സ്​റ്റേ​റ്റ് സെന്റർ ഫോർ അഡ്വാൻസ്ഡ് പ്രിന്റിംഗ് ആൻഡ് ട്രെയിനിംഗ്) നിന്നു 2013ൽ വിരമിച്ച ഭിന്നശേഷിക്കാരനായ എ. വിജുകുമാറിന് വിരമിക്കൽ ആനുകൂല്യമായ 2,77,101 രൂപയുടെ കുടിശിക അടിയന്തരമായി നൽകണമെന്ന് കമ്മിഷൻ ആവശ്യപ്പെട്ടു.
സി ആപ്​റ്റ് സാമ്പത്തിക പ്രതിസന്ധിയിലാണെന്ന് മാനേജിംഗ് ഡയറക്ടർ കമ്മിഷനെ അറിയിച്ചു. 2001-02 മുതൽ സ്ഥാപനം സാമ്പത്തിക പ്രതിസന്ധിയിലായി. 416 ജീവനക്കാരെ സർക്കാർ ഉത്തരവിന്റെ അടിസ്ഥാനത്തിൽ പിരിച്ചുവിട്ടു. അവർക്കുപോലും കുടിശിക നൽകാൻ കഴിഞ്ഞിട്ടില്ല. വിജുകുമാറിനുമുമ്പ് വിടുതൽ ചെയ്ത 9 ജീവനക്കാർക്ക് സർവീസ് ആനുകൂല്യം നൽകേണ്ടതുണ്ടെന്നും കുടിശിക നൽകാൻ സർക്കാരിനോട് ഫണ്ട് ആവശ്യപ്പെട്ടെങ്കിലും ലഭിച്ചിട്ടില്ലെന്നും എം.ഡി നൽകിയ റിപ്പോർട്ടിൽ പറയുന്നു.