തിരുവനന്തപുരം: പൊലീസുമായി ബന്ധപ്പെട്ട കാർട്ടൂണുകൾ കേരളത്തിലെ എല്ലാ പൊലീസ് സ്റ്റേഷനുകളിലും പ്രദ‍ർശിപ്പിക്കുമെന്ന് പൊലീസ് മേധാവി ലോക്‌നാഥ് ബെഹ്‌റ പറഞ്ഞു. കാർട്ടൂണിസ്റ്റ് ഹക്കു വരച്ച പൊലീസിനെക്കുറിച്ചുള്ള കാർട്ടൂണുകളുടെ സമാഹാരം പ്രകാശനം ചെയ്യുകയായിരുന്നു അദ്ദേഹം. കേരളത്തിലെ 481 സ്റ്റേഷനുകളിലും ഇത്തരം കാർട്ടൂണുകൾ പ്രദർശിപ്പിക്കും. പൊലീസ് സ്റ്റേഷനുകളിൽ സന്ദർശകർക്ക് വ്യക്തമായി കാണുന്ന തരത്തിലായിരിക്കും അത്. തമ്പാനൂർ പൊലീസ് സ്റ്റേഷനായി പണിയുന്ന പുതിയ കെട്ടിടസമുച്ചയത്തിലും കാർട്ടൂണുകൾ സ്ഥാപിക്കും. പൊലീസ് ആസ്ഥാനത്ത് നടന്ന ചടങ്ങിൽ എ.ഡി.ജി.പി മനോജ് എബ്രഹാം, ലളിതകലാ അക്കാഡമി എക്‌സിക്യൂട്ടീവ് കമ്മിറ്റി അംഗം കാരയ്ക്കാമണ്ഡപം വിജയകുമാർ, കാർട്ടൂണിസ്റ്റുമാരായ ടി.കെ. സുജിത്ത്, പ്രതാപൻ പുളിമാത്ത് എന്നിവർ പങ്കെടുത്തു.