തിരുവനന്തപുരം: ജി.എസ്.ടിയിൽ ലോട്ടറി നികുതി 28 ശതമാനമായി ഏകീകരിച്ചതിന്റെ ഫലമായി സംസ്ഥാനത്തേക്ക് ഉണ്ടായേക്കാവുന്ന അന്യസംസ്ഥാന ലോട്ടറികളുടെ കുത്തൊഴുക്ക് തടയാൻ,​ ഇവയെ നിയന്ത്രിക്കാനുള്ള അധികാരം കേന്ദ്രത്തിൽ നിന്ന് കേരളം നേടിയെടുക്കേണ്ടി വരും. അന്യ സംസ്ഥാന ലോട്ടറികളെ ഇപ്പോൾ നിയന്ത്രിക്കുന്നത് കേന്ദ്രമാണ്. അതിനാൽ,​ ഇവയെ നിയന്ത്രികുക സംസ്ഥാനത്തിന് എളുപ്പമല്ല.

അന്യസംസ്ഥാന ലോട്ടറികൾക്ക് 28 ശതമാനവും കേരള ലോട്ടറിക്ക് 12 ശതമാനവുമായിരുന്നു നേരത്തേ നികുതി. ഇതാണ്,​ ഇപ്പോൾ ജി.എസ്.ടി കൗൺസിൽ 28 ശതമാനമായി ഏകീകരിച്ചത്. നികുതി കുറഞ്ഞ കേരള ലോട്ടറിയുമായി മത്സരിക്കാനാവാതെ പുറത്തുനിന്ന അന്യസംസ്ഥാന ലോട്ടറികൾ ഇനി സംസ്ഥാനത്തേക്ക് തിരിച്ചെത്തിയേക്കും. നാഗാലാൻഡ്,​ സിക്കിം ലോട്ടറികളുടെ തിരിച്ചുവരവാണ് ഉണ്ടാവുക.

കേരള ലോട്ടറിയെ ആകർഷകമാക്കാൻ കൂടുതൽ തുക സമ്മാനം നൽകാനും കമ്മിഷൻ ഉയർത്താനും സർക്കാർ ആലോചിക്കുന്നുണ്ട്. എന്നാൽ,​ അന്യ സംസ്ഥാന ലോട്ടറിയെ നിയന്ത്രിക്കുക കൂടി ചെയ്‌താലേ വില്പനയും വരുമാനവും ഇടിയാതെ പിടിച്ചുനിറുത്താൻ കഴിയൂ. ഇതിന്,​ കേന്ദ്രത്തിൽ നിന്ന് നിയന്ത്രണാധികാരം നേടുകയാണ് പോംവഴി.

കേരളത്തിന്റെ

വരുമാന സ്രോതസ്

സംസ്ഥാനത്തിന്റെ പ്രധാന നികുതിയേതര വരുമാന സ്രോതസാണ് ലോട്ടറി. കഴിഞ്ഞവർഷം വരുമാനം 9,​276 കോടി രൂപയായിരുന്നു. ലാഭം 1,​673 കോടി രൂപ. നടപ്പുവർഷം ലോട്ടറിയിൽ നിന്നുള്ള റെവന്യൂ വരുമാന പ്രതീക്ഷ 11,​800 കോടി രൂപയാണ്. കേരളത്തിന്റെ നികുതിയേതര വരുമാനത്തിൽ 80 ശതമാനമാണ് ലോട്ടറിയുടെ സംഭാവന.

കാരുണ്യയ്ക്ക്

തിരിച്ചടി?​

ലോട്ടറി വരുമാനം കുറയുന്നത് കാരുണ്യ പദ്ധതികളെ ബാധിക്കുമെന്ന ആശങ്കയുണ്ട്. ഏജന്റുമാർ മാത്രം കേരള ലോട്ടറിക്ക് 75,​000 പേരുണ്ട്. ലോട്ടറിയുമായി ബന്ധപ്പെട്ട് ലക്ഷങ്ങളും ജീവിക്കുന്നു. കേരള ലോട്ടറിയുടെ തകർച്ച ഇവരുടെ ജീവിതത്തിന്റെ താളവും തെറ്റിക്കും.