പാറശാല: അകാലത്തിൽ വിട പറഞ്ഞ സഹപാഠിയുടെ കുടുംബത്തിനായി വീട് നിർമ്മിച്ച് നൽകിയ എൻ.എസ്.എസ് വോളണ്ടിയർ. കിടക്കയിൽ പാമ്പുകടിയേറ്റ് മരിച്ച ചെങ്കൽ മാച്ചിയോട് കാഞ്ഞിരക്കാട്ട് വീട്ടിൽ അനുഷ്‌മ (16) യുടെ കുടുംബത്തിനാണ് പാറശാല ഗവ. ഹയർ സെക്കൻഡറി സ്‌കൂളില സഹപാഠികൾ സ്വരൂപിച്ച ധനം ഉപയോഗിച്ച് വീട് നിർമ്മിച്ച് നൽകിയത്. സ്‌കൂളിലെ രണ്ടാം വർഷ കൊമേഴ്‌സ് വിദ്യാർത്ഥിയായ അനുഷ്‌മ കഴിഞ്ഞ സെപ്റ്റംബർ ഒന്നിന് ആണ് പാമ്പ് കടിയേറ്റ് മരിക്കുന്നത്. അനുഷ്‌മയുടെ ഓർമ്മക്കായി സഹപാഠികൾ ചേർന്ന് വീട് പുനർനിർമ്മിക്കുവാൻ സ്കൂളിലെ എൻ.എസ്.എസ് യൂണിയന്റെ നേതൃത്വത്തിൽ തീരുമാനിക്കുകയായിരുന്നു. സ്കൂളിലെ എല്ലാ വിദ്യാർത്ഥികളുടേയും അദ്ധ്യാപകരുടെയും പി-ടി.എ യുടെയും മറ്റു സുമനസ്സുകളുടേയും സഹകരണത്തോടെ സ്വരൂപിച്ച രണ്ടര ലക്ഷത്തിലേറെ രൂപ ചെലവാക്കിവീടിന്റെ പണി പൂർത്തിയാക്കി. വിദ്യാർത്ഥികളുടെ സഹകരണത്തോടെ നിർമ്മിച്ച വീടിന്റെ താക്കോൽ ദാനകർമ്മം എൻ.എസ്.എസ് ലീഡർ കുമാരി അഞ്ജലി ഉണ്ണി അനിഷ്മയുടെ അമ്മ മെറ്റിൽഡക്ക് കൈമാറി നിർവഹിച്ചു. ജില്ലാ പഞ്ചായത്ത് മെമ്പർ അഡ്വ.എസ്.കെ. ബെൻ ഡാർവിൻ, പ്രിൻസിപ്പൽ എൽ. രാജദാസ്, പ്രോഗ്രാം ഓഫീസർ ടി.ആർ. വിജയകുമാർ, ഹെഡ്മിസ്ട്രസ് ചന്ദ്രിക, പി.ടി.എ. പ്രസിഡന്റ് അരുൺ, വൈസ് പ്രസിഡന്റ് ജയറാം, മറ്റ് പി.ടി.എ ഭാരവാഹികൾ, അദ്ധ്യാപകർ, വിദ്യാർത്ഥികൾ എന്നിവർ പങ്കെടുത്തു.