തിരുവനന്തപുരം: ഇന്ത്യയുടെ ഐക്യത്തെയും സാഹോദര്യത്തെയും ശിഥിലപ്പെടുത്താൻ ശ്രമിക്കുന്ന ശക്തികൾക്കെതിരെ യുവസമൂഹം പ്രതികരിച്ചതാണ് അടുത്തിടെ ജെ.എൻ.യു,​ ജാമിയ മിലിയ,​ ചെന്നൈ സർവകലാശാലകളിൽ കണ്ടതെന്ന് മന്ത്രി ഇ.പി.ജയരാജൻ പറഞ്ഞു.

സ്വാതന്ത്ര്യവും മതനിരപേക്ഷതയും അപകടത്തിലാകുമ്പോൾ യുവജനങ്ങളും വിദ്യാർത്ഥികളും ഒറ്റക്കെട്ടായി പോരാടുന്നത് അഭിമാനകരമാണെന്നും അദ്ദേഹം പറഞ്ഞു.നാല് ദിവസം നീളുന്ന 31-ാമത് സംസ്ഥാന കേരളോത്സവം ടാഗോർ തിയേറ്ററിൽ ഉദ്ഘാടനം ചെയ്യുകയായിരുന്നു മന്ത്രി .

മന്ത്രി എ.സി.മൊയ്തീൻ അദ്ധ്യക്ഷനും. മന്ത്രി കടകംപള്ളി സുരേന്ദ്രൻ മുഖ്യാതിഥിയുമായി. ജില്ലാപഞ്ചായത്ത് പ്രസിഡ‌ന്റ് വി.കെ.മധു,​ സംസ്ഥാന യുവജന കമ്മിഷൻ അദ്ധ്യക്ഷ ചിന്ത ജെറോം,​ കെ.എ.എൽ ചെയർമാൻ കരമന ഹരി,​ നർത്തകി നീനാപ്രസാദ്,​ സന്തോഷ് കാല,​ യുവജനക്ഷേമ ബോർഡ് മെമ്പർ സെക്രട്ടറി മിനിമോൾ എബ്രഹാം,​ ജില്ലായൂത്ത് പ്രോഗ്രാം ഓഫീസർ ചന്ദ്രികാദേവി ആർ.​എസ് തുടങ്ങിയവർ പങ്കെടുത്തു. യുവജനക്ഷേമ ബോർഡ് വൈസ് ചെയർമാൻ പി.ബിജു സ്വാഗതവും ജില്ലാ കോ-ഒാർഡിനേറ്റർ എ.എം.അൻസാരി നന്ദിയും പറഞ്ഞു

. 59 കലാമത്സരങ്ങളിലും 43 കായിക മത്സരങ്ങളിലുമായി 6500 ഓളം പ്രതിഭകളാണ് മാറ്റുരയ്ക്കുന്നത്. ഗവ. ആർട്സ് കോളേജിലെ മൂന്ന് വേദികളിലും ജവഹർ ബാലഭവൻ,​ ഭാരത് ഭവൻ ശിശുക്ഷേമ സമിതി എന്നിവിടങ്ങളിലും കലാമത്സരങ്ങളും സെൻട്രൽ സ്റ്റേഡിയം,​ കാര്യവട്ടം എൽ.എൻ.സി.പി.ഇ ഗ്രൗണ്ട്,​ വെള്ളയമ്പലം സ്വിമ്മിംഗ് പൂൾ,​ ഹോട്ടൽ ചൈത്രം,​ ശംഖുംമുഖം സ്റ്റേഡിയം,​ പൂജപ്പുര മൈതാനം എന്നിവിടങ്ങളിൽ കായിക മത്സരങ്ങളും നടക്കും. 29നാണ് സമാപനം.