തിരുവനന്തപുരം:ഹയർ സെക്കൻഡറി, നോൺ വൊക്കേഷണൽ ഹയർ സെക്കൻഡറി അദ്ധ്യാപക നിയമനത്തിന് സംസ്ഥാനതല യോഗ്യതാ നിർണ്ണയ പരീക്ഷയായ സെറ്റിന് (സ്റ്റേറ്റ് എലിജിബിലിറ്റി ടെസ്റ്റ്) ഡിസംബർ 28 മുതൽ ജനുവരി 10 വരെ ഓൺലൈനായി രജിസ്റ്റർ ചെയ്യാം. സെറ്റ് ഫെബ്രുവരി 2020ന്റെ പ്രോസ്‌പെക്ടസും സിലബസും എൽബിഎസ് സെന്ററിന്റെ വെബ്‌സൈറ്റിൽ ലഭ്യമാണ്.
ബിരുദാനന്തരബിരുദ പരീക്ഷയിൽ 50 ശതമാനത്തിൽ കുറയാതെ മാർക്ക് അല്ലെങ്കിൽ തത്തുല്യ ഗ്രേഡും ബി.എഡുമാണ് അടിസ്ഥാന യോഗ്യത. ചില പ്രത്യേക വിഷയങ്ങളിൽ ബിരുദാനന്തര ബിരുദമുള്ളവരെ ബി.എഡ് നിബന്ധനയിൽ നിന്നും ഒഴിവാക്കിയിട്ടുണ്ട്. എൽറ്റിറ്റിസി, ഡിഎൽഇഡി തുടങ്ങിയ ട്രെയിനിംഗ് കോഴ്സുകൾ വിജയിച്ചവരെ പരിഗണിക്കും. എസ്.സി/ എസ്.ടിക്കാർക്ക് ബിരുദാനന്തരബിരുദത്തിന് അഞ്ച് ശതമാനം മാർക്കിളവ് . ബയോടെക്‌നോളജി ബിരുദാനന്തര ബിരുദവും നാച്വറൽ സയൻസിൽ ബി.എഡും നേടിയവർക്ക് ബയോടെക്‌നോളജിയിൽ സെറ്റ് എഴുതാം.
അടിസ്ഥാന യോഗ്യതയിൽ ഒന്ന് മാത്രം നേടിയവർ: പി.ജി ബിരുദം മാത്രം നേടിയവർ ബി.എഡ് കോഴ്സ് അവസാന വർഷം പഠിക്കുന്നവരാവണം. അവസാനവർഷ പി.ജി കോഴ്സ് പഠിക്കുന്നവർക്ക് ബി.എഡ് ബിരുദം ഉണ്ടായിരിക്കണം. പി.ജി/ ബി.എഡ് പരീക്ഷയുടെ നിശ്ചിത യോഗ്യത സെറ്റ് പരീക്ഷയുടെ ഫലം പ്രഖ്യാപിച്ച തീയതി മുതൽ ഒരു വർഷത്തിനകം നേടിയിരിക്കണം.
ജനറൽ/ ഒ.ബി.സിക്കാർ പരീക്ഷാ ഫീസായി 1000 രൂപയും എസ്.സി/ എസ്.ടി/ ഭിന്നശേഷി വിഭാഗക്കാർ 500 രൂപയും ഓൺലൈനായി അടയ്ക്കണം. ഭിന്നശേഷി വിഭാഗക്കാർ മെഡിക്കൽ സർട്ടിഫിക്കറ്റിന്റെ ഗസറ്റഡ് ഓഫീസർ സാക്ഷ്യപ്പെടുത്തിയ പകർപ്പ് ഹാജരാക്കണം. ഒ.ബി.സി നോൺക്രീമീലെയർ വിഭാഗക്കാർ നോൺക്രീമീലെയർ സർട്ടിഫിക്കറ്റിന്റെയും (2018 ഡിസംബർ 29നും 2020 ജനുവരി 10നും ഇടയിൽ ലഭിച്ചത്), എസ്.സി/ എസ്.ടി വിഭാഗക്കാർ ജാതി തെളിയിക്കുന്ന സർട്ടിഫിക്കറ്റിന്റെയും അസൽ ഹാജരാക്കണം.