ആറ്റിങ്ങൽ: ഡിസംബർ ഫെസ്റ്റിൽ ഏറെ ജനത്തിരക്ക് അനുഭവപ്പെടുന്നത് നാഷണൽ എസ്.സി/ എസ്.ടി ഹബ് കേരളയുടെ 10 സ്റ്റാളുകളിലാണ്. പവലിയനിൽ പലയിടങ്ങളിലായി ഒരുക്കിയിട്ടുള്ള ഈ സ്റ്റാളുകളിൽ കൂടുതലും ഹാന്റ് മെയിഡ് വസ്തുക്കളാണ് ഒരുക്കിയിട്ടുള്ളത്. മുളകൊണ്ടുള്ള കരകൗശല വസ്തുക്കളായ പുട്ടുകുറ്റി,​ രാമച്ചം സ്ക്രബ്,​ വാട്ടർ ബോട്ടിൽ,​ പൂക്കൾ,​ പൂക്കൂട എന്നിവയാണ് ഒരു സ്റ്റാളിൽ ക്രമീകരിച്ചിരിക്കുന്നത്. അടുത്തതിൽ തടികൊണ്ടുള്ള വിവിധ വലിപ്പത്തിലുള്ള ആന,​ തവി,​ കൈതോല പനമ്പ്,​ കൈതോല കുട്ട തുടങ്ങിയവ. മറ്റൊന്നിൽ കൈത്തറി സാരിയും മുണ്ടുമാണ്. ഇവയിൽ സാരിയിൽ ഫാബ്രിക് പെയിന്റ് വർക്കുകൾ ചെയ്തത് സ്ത്രീകളെ ഏറെ ആകർഷിക്കുകയാണ്.

മുളകൊണ്ട് മാത്രമുള്ള വിവിധ ഇനം ലൈറ്റ് ഷെയ്ഡുകൾ,​ ഗ്രാമഫോൺ,​ വാളും പരിചയും,​ ഗ്ലാസ്,​ ജഗ്ഗുകൾ,​ മുളനാഴി,​ പ്ലവർ സ്റ്റാന്റ് തുടങ്ങിയവയാണ് ഒരു സ്റ്റാളിൽ ഒരുക്കിയിരിക്കുന്നത്. ചൂരൽ കൊണ്ടുള്ള വിവിധ ഇനം കസേരകൾ,​ സോഫാ സെറ്റ് ,​ ബേബി ചെയർ,​ ഊഞ്ഞാൽ എന്നിവ കരിച്ചാറയിലെ അവിട്ടം ഗ്രൂപ്പും വൈശാഖം ഗ്രൂപ്പും ഒരുക്കിയിട്ടുണ്ട്. ശെൽവരാജ് മൂപ്പന്റെ ഒറ്റമൂലി സ്റ്റാളാണ് ഈ ശൃംഘലയിലെ മറ്റൊരിനം.

വികാസ് കോട്ടൺ ഷർട്ടുകലുടെ ഒരു സ്റ്റാളും ഇവരുടേതായുണ്ട്. അവിടെ 300 മുതൽ 450 രൂപ വരെയുള്ള ന്യൂജെൻ ഷർട്ടുകൾ ഒരുക്കിയിട്ടുണ്ട്. കൂടാതെ ഓർത്തോ ടിക് ഉപകരണങ്ങളുടെ സ്റ്റാളിൽ ക്രിത്രിമ കാൽ,​ കൈ,​ ഡയബറ്റിക് ചപ്പൽ എന്നിവയും പരിചയപ്പെടാൻ പാകത്തിനാണ് എസ്.സി/എസ്.ടി സ്റ്റാളുകൾ ക്രമീകരിച്ചിരിക്കുന്നത്.