ബാലരാമപുരം: ഗുണ്ടാപ്പിരിവ് നൽകാത്തതിലുള്ള വിരോധത്താൽ ഓട്ടോ ഡ്രൈവരെ കുത്തിമുറിവേൽപ്പിച്ച് കൊലപ്പെടുത്താൻ ശ്രമിച്ച കേസിലെ പ്രതി പിടിയിൽ. പൂങ്കോട് അജ്ഞലി ഭവനിൽ രാധാകൃഷ്ണന് (56)​ നേരെയാണ് ആക്രമണമുണ്ടായത്. സംഭവത്തിൽ വെടിവെച്ചാൻകോവിൽ പുഷ്പനിവാസിൽ കാട്ടാക്കട രാജേഷ് എന്ന് വിളിക്കുന്ന രാജേഷ് (41)​ ആണ് അറസ്റ്റിലായത്. ഇന്നലെ ഉച്ചക്ക് ഒരു മണിയോടെയായിരുന്നു സംഭവം. മദ്യപിക്കാൻ പണം ആവശ്യപ്പെട്ട് പ്രതി രാധാകൃഷ്ണനെ ആക്രമിക്കുകയായിരുന്നുവെന്ന് പൊലീസ് പറ‍ഞ്ഞു. നിരവധി അടിപിടി കേസിലെ പ്രതിയാണ് ഇയാൾ. ബാലരാമപുരം സി.ഐ ജി.ബിനു,​ എസ്.ഐ വിനോദ് കുമാർ,​ എ.എസ്.ഐമാരായ ജ്യോതിഷ്,​ സജീവ്,​ സി.പി.ഒ ശ്രീകാന്ത്,​ സുനു എന്നിവരുടെ നേത്യത്വത്തിലാണ് പ്രതിയെ പിടികൂടിയത്. ഇയാളെ റിമാൻഡ് ചെയ്തു.