ചേർത്തല:അർത്തുങ്കൽ സെന്റ് ആൻഡ്രൂസ് ബസലിക്കയിൽ വിശുദ്ധ സെബസ്ത്യാനോസിന്റെ തിരുനാൾ ദിനമായ ജനുവരി 20ന് ജില്ലയിൽ പൊതു അവധി പ്രഖ്യാപിക്കാൻ സർക്കാരിനോട് ശുപാർശ ചെയ്യാൻ അവലോകന യോഗം തീരുമാനിച്ചു.ചേർത്തല – അർത്തുങ്കൽ,ചേർത്തല – ആലപ്പുഴ റോഡുകളുടെ അ​റ്റകു​റ്റപണികൾ പൂർത്തിയാക്കുക,തിരുനാൾ ദിനങ്ങളിൽ യാചക നിരോധനം ഏർപ്പെടുത്തുക, പള്ളിയുടെ 2 കിലോമീ​റ്റർ ചു​റ്റളവിൽ മദ്യം നിരോധിക്കുക തുടങ്ങിയ ആവശ്യങ്ങളും ഉന്നയിച്ചു. ശുദ്ധജല വിതരണം തടസം കൂടാതെ നടത്തിയും പൊലീസ്,അഗ്നിശമന,ആരോഗ്യ,ഗതാഗത,വൈദ്യുതി,ജലസേചന, പഞ്ചായത്ത് തുടങ്ങിയ വകുപ്പുകളുടെ സേവനം ഉറപ്പാക്കിയും വകുപ്പുകളെ ഏകോപിപ്പിച്ചു പ്രവർത്തനങ്ങൾ നടത്താനും യോഗം തീരുമാനിച്ചു.ആർ.ഡി.ഒ എസ്.വിജയൻ അദ്ധ്യക്ഷത വഹിച്ചു. തഹസിൽദാർ ആർ.ഉഷ,ബസലിക്ക റെക്ടർ ഫാ.ക്രിസ്​റ്റഫർ എം.അർത്ഥശേരിൽ,പഞ്ചായത്ത് പ്രസിഡന്റ് ലീലാമ്മ ആന്റണി,അർത്തുങ്കൽ വില്ലേജ് ഓഫിസർ കെ.രമ,അസി.വികാരി ഫാ.ജോസഫ് ഗ്ലെൻ,അർത്തുങ്കൽ എസ്.ഐ ടോൾസൻ ജോസഫ്,എക്സൈസ് സി.ഐ.ബൈജു,കോസ്റ്റൽ പൊലീസ് സി.ഐ എം.മനോജ് ,ബെന്നി ജോയ്,സൈറസ് കോയിപ്പറമ്പിൽ,സുനിൽ കോയിപ്പറമ്പിൽ,ജോസഫ് പുളിക്കൽ,സജിത്ത് വർക്കി,സാംസൺ കൊട്ടാപ്പള്ളി, സാബു തയ്യിൽ എന്നിവർ പങ്കെടുത്തു.