ആലപ്പുഴ: വിദ്യാഭ്യാസ ചരിത്രത്തിൽ ആദ്യമായി പങ്കാളിത്ത ചരിത്ര രചനയിലൂടെ ജില്ലയുടെ പ്രാദേശിക ചരിത്രം ഒരുക്കി വിദ്യാർത്ഥികൾ. 1000 കുട്ടികൾ ചേർന്ന് രചിച്ച 400 പേജുള്ള ജില്ലയുടെ പ്രാദേശിക ചരിത്രമായ നാട്ടുവഴികൾ പൊതു വിദ്യാഭ്യാസ ഡയറക്ടർ കെ.ജീവൻ ബാബു വിദ്യാഭ്യാസ ഉപഡയറക്ടർ ധന്യ ആർ.കുമാറിന് നൽകി പ്രകാശനം ചെയ്തു.

ജില്ലാ പഞ്ചായത്ത് പദ്ധതി പ്രകാരം പൊതുവിദ്യാഭ്യാസ വകുപ്പിന് കീഴിലെ ജില്ലാ സാമൂഹ്യ ശാസ്ത്ര കൗൺസിലിന്റെ നേതൃത്വത്തിലായിരുന്നു ചരിത്രരചന. സംസ്ഥാനത്ത് ആദ്യമായാണ് ഇത്രയേറെ കുട്ടികൾ ചരിത്രരചനയിൽ പങ്കാളികളാകുന്നത്. യു.പി,ഹൈസ്‌കൂൾ വിദ്യാർത്ഥികളാണ് പ്രാദേശിക ചരിത്ര ഗ്രന്ഥം രചിച്ചത്. ജില്ല പഞ്ചായത്ത് പ്രസിഡന്റ് ജി.വേണുഗോപാൽ അദ്ധ്യക്ഷത വഹിച്ചു. കല്ലേലി രാഘവൻ പിള്ള മുഖ്യ പ്രഭാഷണം നടത്തി. സി.കെ.പവിത്രൻ പുസ്തകം പരിചയപ്പെടുത്തി. നഗരസഭ ചെയർമാൻ ഇല്ലിക്കൽ കുഞ്ഞുമോൻ, ജില്ല പഞ്ചായത്ത് വിദ്യാഭ്യാസ സ്റ്റാൻഡിംഗ് കമ്മിറ്റി ചെയർമാൻ അഡ്വ.കെ.റ്റി.മാത്യു, നഗരസഭ വിദ്യാഭ്യാസ സ്റ്റാൻഡിംഗ് കമ്മിറ്റി ചെയർമാൻ അഡ്വ. ജി.മനോജ് കുമാർ, എസ്.ഐ.ഇ.ടി ഡയറക്ടർ ബി.അബുരാജ്, ജില്ല പഞ്ചായത്ത് അംഗങ്ങൾ, നഗരസഭാ കൗൺസിലർമാർ തുടങ്ങിയവർ സംസാരിച്ചു.