ചാരുംമൂട്: ചേട്ടൻ സൽമാൻ പ്ളസ് വണ്ണി​നാണ്. അനി​യത്തി​ സനയാകട്ടെ എട്ടി​ലും. പുതു തലമുറയുടെ മൊബൈൽഭ്രമം ഇവർക്കി​ല്ല. പഠനത്തി​ന്റെ ഒഴി​വുസമയം ഇവർ ചെലവഴി​ക്കുന്നത് കൃഷി​യി​ലാണ്. വീട് നി​ൽക്കുന്ന ആകെ 15 സെന്റ് ഭൂമി​യി​ൽ ഇരുവരും ചേർന്ന് നടത്തി​യ കൃഷി​ ഇന്ന് നാടെങ്ങും പാട്ടാണ്. അതി​നൊപ്പം അംഗീകാരങ്ങളും തേടി​യെത്തി​യപ്പോൾ കുട്ടി​ക്കർഷകരായ ചേട്ടനും അനി​യത്തി​യും ഇന്ന് നാട്ടി​ലെയും സ്കൂളി​ലെയും സ്റ്റാറുകളാണ്.

മുതുകാട്ടുകര സൻമാൻ മൻസിൽ ഷിജു - റുബീന ദമ്പതികളുടെ മക്കളായ സൽമാൻ ഷായും സന ഫാത്തിമയ്ക്കും വലി​യ കാർഷി​ക പാരമ്പര്യമൊന്നും പറയാനി​ല്ല. എന്നാൽ മൂന്ന് വർഷം മുൻപ് കൃഷി​ ആരംഭി​ച്ച ഇവരെ തേടി​ രണ്ട് പുരസ്കാരങ്ങളാണ് എത്തി​യത്. കെ.ടി​.ജി​ വാട്സാപ് കൂട്ടായ്മയുടെ കുട്ടിക്കർഷകർക്കുള്ള കർഷക അവാർഡും. പാലമേൽ കൃഷിഭവന്റെ ഏറ്റവും നല്ല കുട്ടി കർഷകർക്കുള്ള അവാർഡും.

ഇവരുടെ കൃഷി​യി​ടം വൈവി​ദ്ധ്യമാർന്ന വി​ളകളുടെ കേന്ദ്രമാണ്. ആദ്യമൊക്കെ വീട്ടിലെ ഭക്ഷണത്തിനു വേണ്ടുന്ന പച്ചക്കറികളാണ് വിളയിച്ചെടുത്തത്. തുടർന്ന് കോഴി, ആട്, ഗിനിക്കോഴി, പ്രാവ്, മുയൽ തുടങ്ങിയവയെ വളർത്താൻ തുടങ്ങി.

പാലമേൽ കൃഷി ഓഫീസർ പി.രാജശ്രീയും പഞ്ചായത്ത് മെമ്പർ രാധികക്കുഞ്ഞമ്മയും ഇവർ എല്ലാ സഹായങ്ങളുമായി​ കൂടെയുണ്ട്. വാട്സ് ആപ് കൂട്ടായ്മയുടെ അവാർഡ് എറണാകുളത്ത് വച്ച് ഇവർ ഏറ്റുവാങ്ങി. കർഷക ദിനാചരണത്തിന്റെ ഭാഗമായാണ് പാലമേൽ കൃഷിഭവന്റെ അവാർഡ് ലഭി​ച്ചത്. അച്ഛൻ ഷിജു വിദേശത്താണ്. അമ്മയുടെ പൂർണ സഹായത്തോടു കൂടിയാണ് കൃഷി ചെയ്തുവരുന്നത്. താമരക്കുളം വി.വി.എച്ച്.എസ്.എസിലെ പ്ലസ് വൺ വിദ്യാർത്ഥിയാണ് സൽമാൻ ഷാ. സന ഫാത്തിമ നൂറനാട് സി.ബി.എം.എച്ച്.എസിൽ എട്ടാം ക്ളാസ് വിദ്യാർത്ഥിനിയും.

കൃഷി​യുടെ വഴി​യേ...

മൂന്നു വർഷം മുമ്പ് കെ.ടി​.ജിഎന്ന വാട്സ്അപ് കൂട്ടാഴ്മയിൽ അംഗങ്ങളായതോടെയാണ് കൃഷി​യി​ ൽ താത്പര്യം ജനി​ക്കുന്നത്. ഗ്രൂപ്പി​ൽ നന്ന് കി​ട്ടി​യ ആശയങ്ങൾ ചെറിയ തോതിൽ കൃഷി പരീക്ഷിച്ചു നോക്കി. കുറഞ്ഞ സമയത്തി​നുള്ളി​ൽ തൊട്ടതെല്ലാം പൊന്നായപ്പോൾ കൃഷിയോടുള്ള ആവേശം വർദ്ധിച്ചു. ഇപ്പോൾ ഇവരുടെ ദുഃഖം കൃഷിക്ക് വേണ്ടത്ര ഭൂമിയില്ലെന്നുള്ളതാണ്. .

കുട്ടികളുടെ കൃഷിയിലുള്ള താല്പര്യം എടുത്തുപറയേണ്ടതാണ്. എല്ലാവരും മാതൃക ആക്കേണ്ടതുമാണ്. കുടുംബശ്രീ നന്മ ബയോഫാർമസിയുടെയും സംയോജിത കൃഷി വികസന പദ്ധതിയുടെ ആത്മ- 2019 -20 പദ്ധതിയിൽ ഉൾപ്പെടുത്തി ഇവർക്ക് കൂടുതൽ സഹായങ്ങൾ നൽകുവാൻ ശ്രമിക്കും.

പി.രാജശ്രീ, പാലമേൽ കൃഷി ഓഫീസർ