തൊടുപുഴ: മോഷ്ടിച്ച സ്‌കൂട്ടറുമായി എത്തിയയാൾ അപകടത്തിൽപ്പെട്ടയാളുടെ ബൈക്കുമായി കടന്നു. ഇന്നലെ രാവിലെ 11 മണിയോടെയാണ് സംഭവം. പാമ്പനാറിൽ നിന്നും അറക്കുളത്തിനു വരികയായിരുന്ന പാമ്പനാർ പുത്തൻപുരയ്ക്കൽ രഘു അന്ത്യൻപാറയ്ക്കു സമീപം ഗട്ടറിൽ വീണ് അപകടത്തിൽ പെട്ടു. പരിക്കേറ്റില്ലെങ്കിലും ബൈക്ക് സ്വന്തമായി ഉയർത്താൻ കഴിയാതെ ബുദ്ധിമുട്ടിനിൽക്കുകയായിരുന്ന രഘുവിനെ, മറ്റൊരുസ്‌കൂട്ടറിലെത്തിയയാൾ സഹായിക്കാൻ കൂടി. ഉയർത്തിയെടുത്ത ബൈക്കുമായി ഇയാൾ കടന്നുകളഞ്ഞു.

ഉടൻതന്നെ നാട്ടുകാരും മറ്റും ചേർന്ന് അന്വേഷിച്ചെങ്കിലും ബൈക്ക് കണ്ടെത്താനായില്ല. ഇയാൾ ഉപേക്ഷിച്ചു പോയ സ്കൂട്ടർ പരിശോധിച്ചപ്പോഴാണ് ഇത് മോഷ്ടിച്ചതാണെന്ന് മനസിലായത്. ഞായറാഴ്ച ആലപ്പുഴയിലെ പള്ളി മുറ്റത്തുനിന്ന് മോഷ്ടിച്ചതാണ് സ്കൂട്ടർ. കെ.എൽ 37 ഇ 1990 ബൈക്കാണ് മോഷണം പോയത്. കാഞ്ഞാർ പൊലീസിൽ പരാതി നൽകി.