അമ്പലപ്പുഴ: വിവിധ ആവശ്യങ്ങൾ ഉന്നയിച്ച് കേപ്പ് കോൺട്രാക്ട് എംപ്ലോയീസ് യൂണിയന്റെ നേതൃത്വത്തിൽ ഇന്നലെ മുതൽ അനിശ്ചിതകാല പണിമുടക്ക് തുടങ്ങിയതോടെ വാടയ്ക്കൽ സാഗര ആശുപത്രിയുടെ പ്രവർത്തനം തടസപ്പെട്ടു. കരാർ ജീവനക്കാരോടുള്ള അവഗണന അവസാനിപ്പിക്കുക,തടഞ്ഞുവച്ചിരിക്കുന്ന ഡിസംബർ മാസത്തെ ശമ്പളം ഉടൻ നൽകുക,2017ൽ സർക്കാർ പ്രഖ്യാപിച്ച ദിവസ കരാർ ജീവനക്കാരുടെ അടിസ്ഥാന വേതനം ഉടൻ നടപ്പാക്കുക, ഇ.എസ്.ഐ ആനുകൂല്യം ക്ലീനിംഗ് തൊഴിലാളികൾക്കും നടപ്പാക്കുക എന്നീ ആവശ്യങ്ങൾ ഉന്നയിച്ചാണ് പണിമുടക്ക്. 250ഓളം കരാർ ജീവനക്കാരാണ് ഇവിടെ ജോലി ചെയ്യുന്നത്. അത്യാഹിത വിഭാഗത്തേയും, ഡയാലിസിസ് വിഭാഗത്തേയും സമരത്തിൽ നിന്ന് ഒഴിവാക്കിയിരുന്നു.