ആലപ്പുഴ : ഓൾ കേരള സ്‌കൂൾ ടീച്ചേഴ്സ് യൂണിയൻ (എ.കെ.എസ്.ടി.യു) സംസ്ഥാന സമ്മേളനം 5 മുതൽ 8 വരെ ആലപ്പുഴയിൽ നടക്കുമെന്ന് സംഘാടകർ വാർത്താസമ്മേളനത്തിൽ അറിയിച്ചു.
5ന് വൈകിട്ട് 4 ന് ടി.വി.തോമസ് സ്മാരക ടൗൺഹാളിൽ പി.ആർ.നമ്പ്യാർ സ്മാരക പുരസ്‌ക്കാര സമർപ്പണവും സാംസ്കാരിക ഐദ്യദാർഢ്യ സമ്മേളനവും നടക്കും. ഉദ്ഘാടനവും പുരസ്കാര വിതരണവും സി.പി.ഐ ദേശിയ കൺട്രോൾ കമ്മിഷൻ ചെയർമാൻ പന്ന്യൻ രവീന്ദ്രൻ നിർവ്വഹിക്കും. സി.പി.ഐ ദേശിയ സെക്രട്ടേറിയ​റ്റ് അംഗം ബിനോയ് വിശ്വം എം.പി പുരസ്കാരം ഏ​റ്റുവാങ്ങും. ആലങ്കോട് ലീലാകൃഷ്ണൻ മുഖ്യപ്രഭാഷണം നടത്തും.
6ന് വൈകിട്ട് 3 ന് ആലപ്പുഴ നഗരചത്വരത്തിൽ നിന്ന് പ്രകടനം ആരംഭിക്കും.തുടർന്ന് ടൗൺഹാൾ അങ്കണത്തിൽ നടക്കുന്ന പൊതുസമ്മേളനം മുല്ലക്കര രത്നാകരൻ എം .എൽ .എ ഉദ്ഘാടനം ചെയ്യും. സ്വാഗതസംഘം ചെയർമാൻ ടി.ജെ.ആഞ്ചലോസ് അദ്ധ്യക്ഷത വഹിക്കും.
7ന് രാവിലെ 9.30ന് ടൗൺഹാളിൽ പ്രതിനിധി സമ്മേളനം സി.പി.ഐ സംസ്ഥാന സെക്രട്ടറി കാനം രാജേന്ദ്രൻ ഉദ്ഘാടനം ചെയ്യും.ഉച്ചയ്ക്ക് 2ന് വിദ്യാഭ്യാസ സമ്മേളനം വിദ്യാഭ്യാസ മന്ത്റി സി രവീന്ദ്രനാഥ് ഉദ്ഘാടനം ചെയ്യും. എ.കെ.എസ്.ടി യു സംസ്ഥാന സെക്രട്ടറി എം.വിനോദ് അദ്ധ്യക്ഷത വഹിക്കും. വൈകിട്ട് 5ന് കലാസന്ധ്യ. 6ന് യാത്രയയപ്പ് സമ്മേളനം മന്ത്റി ഇ ചന്ദ്രശേഖരൻ ഉദ്ഘാടനം ചെയ്യും. എ.കെ.എസ്.ടി യു സംസ്ഥാന സെക്രട്ടറി കെ.ബുഹാരി അധ്യക്ഷത വഹിക്കും. മന്ത്റി പി.തിലോത്തമൻ ഉപഹാര സമർപ്പണം നടത്തും.
സമ്മേളനത്തോട് അനുബന്ധിച്ച് ഇന്ന് ആലപ്പുഴ ജവഹർ ബാലഭവനിൽ നടക്കുന്ന നാടകോത്സവം വിപ്ലവ ഗായിക പി. കെ.മേദിനി ഉദ്ഘാടനം ചെയ്യും. സ്വാഗതസംഘം ചെയർമാൻ ടി.ജെ.ആഞ്ചലോസ്, എ.കെ.എസ്.ടി.യു സംസ്ഥാന ജനറൽ സെക്രട്ടറി എൻ.ശ്രീകുമാർ, പ്രസിഡന്റ് ഒ.കെ.ജയകൃഷ്ണൻ, സ്വാഗതസംഘം ജനറൽ കൺവീനർ കെ.സി. സ്നേഹശ്രീ, എ.കെ.എസ്.ടി.യു ജില്ലാ സെക്രട്ടറി ഉണ്ണി ശിവരാജൻ തുടങ്ങിയവർ വാർത്താസമ്മേളനത്തിൽ പങ്കെടുത്തു.