ന്യൂഡൽഹി: എല്ലാ പ്ലസ്ടു വിദ്യാർത്ഥികൾക്കും ബി.എസ്‌സി നഴ്‌സിംഗ് പഠിക്കാൻ ഇന്ത്യൻ നഴ്‌സിംഗ് കൗൺസിൽ അവസരമൊരുക്കുന്നു. കൗൺസിൽ പുറത്തിറക്കിയ ബി.എസ്‌സി നഴ്‌സിംഗിന്റെ പുതുക്കിയ സിലബസിന്റെ കരടിലാണ് ഈ നിർദേശമുള്ളത്. നിലവിൽ പ്ലസ്ടുവിന് ജീവശാസ്ത്രം പഠിക്കുന്ന സയൻസ് ഗ്രൂപ്പുകാർക്ക് മാത്രമാണ് നാല് വർഷത്തെ ബി.എസ്‌സി നഴ്‌സിംഗിന് ചേരാൻ കഴിയൂ.

ത്രിവർഷ ജനറൽ നഴ്‌സിംഗ് ആൻഡ് മിഡ്‌വൈഫറി കോഴ്‌സ് 2021ൽ നിറുത്താൻ തീരുമാനിച്ചതിന് പിന്നാലെയാണ് പുതിയ നിർദ്ദേശം. സി.ബി.എസ്.ഇ, ഐ.സി.എസ്.ഇ, എസ്.എസ്.സി.ഇ, എച്ച്.എസ്.സി.ഇ, എ.ഐ.എസ്.എസ്.സി.ഇ എന്നിവ നടത്തുന്ന പ്ലസ്ടു പരീക്ഷയിൽ ഇലക്ടീവ് വിഷയങ്ങൾക്ക് മൊത്തം 45 ശതമാനം മാർക്കുള്ളവർക്ക് അപേക്ഷിക്കാം. ഇംഗ്ലീഷിന് പാസ് മാർക്ക് വേണം. കേന്ദ്രസർക്കാരിന്റെ അംഗീകാരമുള്ള നാഷണൽ ഇൻസ്റ്റിറ്റ്യൂട്ട് ഒഫ് ഓപ്പൺ സ്‌കൂൾ, സ്റ്റേറ്റ് ഓപ്പൺ സ്‌കൂളുകളിലൂടെ പ്ലസ് ടു പരീക്ഷയിൽ നിശ്ചിത യോഗ്യത ലഭിച്ചവർക്കും അപേക്ഷിക്കാം.

വൊക്കേഷണൽ എ.എൻ.എം./ആർ.എ.എൻ.എം. വിദ്യാർത്ഥികൾക്കും അപേക്ഷിക്കാം. സർവകലാശാലയോ, സംസ്ഥാന സർക്കാരോ നടത്തുന്ന പ്രവേശനപരീക്ഷയ്‌ക്ക് 50 ശതമാനം മാർക്കും നേടിയിരിക്കണം. ആക്ഷേപങ്ങളും അഭിപ്രായങ്ങളും 24 വരെ bscsyllabus@gmail.com എന്ന ഇ -മെയിലിൽ അറിയിക്കാം.