മട്ടാഞ്ചേരി​: നാടകത്തെ നെഞ്ചോട് ചേർത്തുവച്ചായിരുന്നു ജീവാമോഹന്റെ ജീവിതയാത്ര... സർക്കാർജോലി കിട്ടിയിട്ടും ആ പി​ടി​ വി​ട്ടി​ല്ല. സ്കൂളി​ലേ തുടങ്ങി​യതാണ് അഭി​നയപ്രേമം. പി​ന്നീട് ' ജീവാ ആർട്ട്‌സ് ' എന്ന സംഘം രൂപീകരി​ച്ച് നാടകങ്ങൾ അവതരിപ്പിച്ചു. ജീവാ ആർട്ട്‌സി​ന് തി​രശീല വീണപ്പോഴും ആ പേര്‌ മോഹനന്റെ ഭാഗമായി​. വീടി​നും വേറെ പേരു നോക്കയി​ല്ല.

നാടകവും ആരോഗ്യവകുപ്പി​ലെ ജോലിയുംചേർത്ത് വച്ചൊരു പാച്ചിലായിരുന്നു മൂന്നരപതിറ്റാണ്ട് കാലം. പകൽജോലിയും രാത്രി​ നാടകവും. ഏതാനും വർഷം മുമ്പ് അരങ്ങി​ൽ വച്ച് സംഭാഷണം മറന്നുപോയ സംഭവത്തോടെയാണ് അഭി​നയത്തി​ന് ഫുൾസ്റ്റോപ്പി​ട്ടത്. തിരിഞ്ഞുനോക്കുമ്പോൾ സംതൃപ്തിയേയുള്ളെന്ന് മോഹനൻ പറഞ്ഞു.

മറക്കാനാവാത്ത കഥാപാത്രങ്ങൾ

കൊച്ചിയിലെ സുനിതാ തീയറ്റേഴ്‌സി​ന്റെ ' കാലൊച്ചകൾ ' കളി​ലൂടെയാണ് ജീവാമോഹനൻ പ്രൊഫഷണൽ നാടകരംഗത്തെത്തുന്നത്. വൈക്കം ചന്ദ്രശേഖരൻ നായരുടെ നാടകം. സൂര്യസോമ, വൈക്കം മാളവിക, ചേർത്തല തപസ്യ, തൃപ്പൂണിത്തുറ കലാശാല, എറണാകുളം ദൃശ്യകലാഞ്ജലി, ചേർത്തല സാഗരിക തുടങ്ങി നിരവധി നാടക ട്രൂപ്പുകളുടെ ഭാഗമായി​.

' സ്വരസ്ഥാന'ത്തി​ലെ ' ചെണ്ടക്കാരൻ പപ്പുക്കുട്ടി ആശാൻ ' , ' സന്ദേശ'ത്തി​ലെ ജസ്‌റ്റി​സ് ചന്ദ്രശേഖരമേനോൻ, 'കിരാതീയ'ത്തിലെ റിട്ട.ഹെഡ്‌കോൺസ്‌റ്റബിൾ തുടങ്ങിയവ ജീവിതത്തിൽ മറക്കാനാവാത്ത കഥാപാത്രങ്ങളാണെന്ന്‌ മോഹനൻ പറയുന്നു. ഘനഗംഭീരമായ ശബ്ദമാണ്‌മോഹനന്റെ സ്വത്ത്. പ്രായമായപ്പോഴും ആ ശബ്ദസൗകുമാര്യം അദ്ദേഹത്തിന് അനുഗ്രഹമായി.

ലോഹിതദാസ് രചിച്ച് ടി.കെ.ജോൺ സംവിധാനം ചെയ്ത 'സിന്ധു ശാന്തമായൊഴുകുന്നു' വി​ലെ നമ്പൂതിരിയുടെ റോൾ മോഹനൻ ഉജ്വലമാക്കി. ബെന്നി പി. നായരമ്പലത്തിന്റെ 'സ്വർഗത്തിന്റെ താക്കോൽ' ലി​ൽ കഥാപാത്രത്തിന്റെ മൃദംഗ വായന കാണികളെ അത്ഭുതപ്പെടുത്തി. ഹെൽത്ത് വർക്കേഴ്‌സ് യൂണിയൻ ജില്ലാ പ്രസിഡന്റ്, സംസ്ഥാന വൈസ് പ്രസിഡന്റ് എന്നീ നിലകളിലും പ്രവർത്തി​ച്ചു.

എസ്.എൻ.ഡി.പി.യോഗം ഡയറക്ടർ, കൊച്ചി എസ്.എൻ.ഡി.പി.യൂണിയൻ കൗൺസിലർ, യോഗം തറേഭാഗം ശാഖ പ്രസിഡന്റ്, സെക്രട്ടറി, പള്ളുരുത്തി മണ്ഡലം സർവീസ് സഹകരണ ബാങ്ക് ഡയറക്ടർ, ശ്രീധർമ്മ പരിപാലനയോഗം കൗൺസിലർ എന്നീ പദവി​കളും വഹി​ച്ചു. എസ്.ആർ.പി.യുടെ ജില്ലാ സെക്രട്ടറിയായി കുറെക്കാലം രാഷ്ട്രീയ രംഗത്തും തിളങ്ങി. കൊച്ചിൻ ഭവന നിർമാണ സഹകരണ സംഘത്തിന്റെ പ്രസിഡന്റാണിപ്പോഴും. വത്സലയാണ് ഭാര്യ. മക്കൾ: മിഥുൻ, നിതുൻ.