മൂവാറ്റുപുഴ: ദേശീയ ബധിര കായിക മേളയിൽ അസീസി ബധിര വിദ്യാലയത്തിന് വിജയം . ഡിസംബർ 27 മുതൽ 30 വരെ കോഴിക്കോട് മെഡിക്കൽ കോളേജ് ഗ്രൗണ്ടിൽ നടന്ന ഏഴാമത് ദേശീയ ബധിര കായിക മേളയിൽ മൂവാറ്റുപുഴ ഈസ്റ്റ് വാഴപ്പിള്ളി അസീസി സ്‌കൂൾ ഫോർ ഡെഫിലെ കായിക താരങ്ങൾക്ക് മികച്ച വിജയം. സ്‌കൂളിൽ നിന്നും പങ്കെടുത്ത എല്ലാ വിഭാഗത്തിലും സമ്മാനങ്ങൾ കരസ്ഥമാക്കി അസീസിയുടെ പ്രതിഭകൾ കളിക്കളത്തിലെ മിന്നും താരങ്ങളായി . വിഷ്ണു പ്രിയ വിനോദ് 100മീറ്റർ റിലേയിൽ ഒന്നാം സ്ഥാനവും, 400മീറ്റർ ഓട്ടത്തിൽ ഒന്നാം സ്ഥാനവും, 200മീറ്റർ ഓട്ടത്തിൽ രണ്ടാം സ്ഥാനവും കരസ്ഥമാക്കി. വർഗീസ്.വി. യോഹന്നാൻ ഷോട്ട്പുട്ട് മത്സരത്തിൽ രണ്ടാം സ്ഥാനവും, ഡിസ്‌കസ് ത്രോയിൽ രണ്ടാം സ്ഥാനവും, ലോംഗ് ജംബിൽ രണ്ടാം സ്ഥാനവും കരസ്ഥമാക്കി. ആദിത്യ രാജേന്ദ്രൻ 100മീറ്റർ റിലേയിൽ ഒന്നാം സ്ഥാനവും, മീര.എം.എസ് ഷോട്ട് പുട്ടിൽ ഒന്നാം സ്ഥാനവും, രമ്യാ.എസ്.600മീറ്റർ ഓട്ടത്തിൽ മൂന്നാം സ്ഥാനവും കരസ്ഥമാക്കി. സ്‌കൂളിലെ കായിക അദ്ധ്യാപിക ഷൈനി ഷാജിയുടെ പരിശീലനത്തിലാണ് കുട്ടികളെ മത്സരത്തിനായി ഒരുങ്ങിയത്. ദേശീയ ബധിര കായിക മേളയിൽ കേരളം ഓവറോൾ കിരീടം നേടുകയും ചെയ്തു. മത്സരത്തിൽ പങ്കെടുത്ത് വിജയികളായി തിരിച്ചെത്തിയ കായിക അദ്ധ്യപികമാരായ ഷൈനി ഷാജിയ്ക്കും, സിസ്റ്റർ നമിതയ്ക്കും, കായിക താരങ്ങളായ വിഷ്ണുപ്രിയ വിനോദ്, വർഗീസ്.വി.യോഹന്നാൻ, ആദിത്യ രാജേന്ദ്രൻ, മീര.എം.എസ്, രമ്യാ.എസ്.എന്നിവർക്ക് സ്‌കൂളിൽ സ്വീകരണം നൽകി. സ്വീകരണ സമ്മേളനം മൂവാറ്റുപുഴ പൊലീസ് സബ് ഇൻസ്‌പെക്ടർ ടി.എം.സൂഫി ഉദ്ഘാടനം ചെയ്തു. വാർഡ് മെമ്പർ ആന്റണി ജോസഫ്, ഹെഡ്മിസ്ട്രസ് സിസ്റ്റർ ജീവ ഫ്രാൻസിസ്, ലോക്കൽ മാനേജർ സിസ്റ്റർ സൂസോ ഫ്രാൻസിസ് എന്നിവർ സംസാരിച്ചു.