തൃക്കാക്കര: ജില്ലയിൽ ഏഴാമത് സാമ്പത്തിക സെൻസസിന്റെ വിവരശേഖരണം ആരംഭിച്ചു. ജില്ലാ കളക്ടർ എസ്.സുഹാസിന്റെ ഔദ്യോഗിക വസതിയിൽ നിന്നും വിവരങ്ങൾ ശേഖരിച്ച് ജില്ലാതല ഉദ്ഘാടനം നിർവഹിച്ചു. സാമ്പത്തിക സംരംഭങ്ങൾ നടത്തുന്ന മുഴുവൻ കുടുംബങ്ങളുടേയും സ്ഥാപനങ്ങളുടേയും വിവരങ്ങൾ സെൻസസിൽ ശേഖരിക്കുന്നുണ്ട്. കേന്ദ്ര സ്ഥിതിവിവരക്കണക്ക് പദ്ധതി നിർവഹണ മന്ത്രാലയമാണ് സെൻസസ് നടത്തുന്നത്. ഇലക്ട്രോണിക് വിവര സാങ്കേതിക മന്ത്രാലയത്തിന്റെ കീഴിലുള്ള സി.എസ്.സി ഇ-ഗവേണൻസ് ഇന്ത്യ ലിമിറ്റഡിനാണ് സെൻസസ് നടത്തിപ്പിനുള്ള ചുമതല. കാർഷികേതര മേഖലയിൽ ഉൾപ്പടെ സ്വന്തം ഉപയോഗത്തിനായുള്ള തൊഴികെ എല്ലാത്തരം ചരക്ക് സേവന ഉപ്പാദന, വിതരണ സംരംഭങ്ങളുടേയും കണക്ക് ശേഖരിക്കുന്നുണ്ട്. പേര്, വിലാസം , ഫോൺ നമ്പർ, കുടുംബാംഗങ്ങളുടെ എണ്ണം സാമ്പത്തിക പ്രവർത്തനങ്ങളുടെ വിശദാംശങ്ങൾ തുടങ്ങിയവ സെൻസസ് ഉദ്യോഗസ്ഥർ ശേഖരിക്കും. വിവരശേഖരണം , മൂല്യനിർണ്ണയം, റിപ്പോർട്ട് തയാറാക്കൽ , പ്രചരണം എന്നിവയ്ക്കായി ഡിജിറ്റൽ ഫ്ലാറ്റ്ഫോമാണ് ഉപയോഗിക്കുന്നത്.
ഉദ്ഘാടന ചടങ്ങിൽ ഇക്കണോമിക്സ് ആന്റ് സ്റ്റാറ്റിക്സ് ഡപ്യൂട്ടി ഡയറക്ടർ സിൻസി മോൾ ആന്റണി, ഇക്കണോമിക്സ് ആൻഡ് സ്റ്റാറ്റിക്സ് റിസർച്ച് ഓഫീസർ താഹിറ കെ.എം. , സീനിയർ സ്റ്റാറ്റിക്കൽ ഓഫീസർ ജി.ബാലഗോപാൽ, ഇ-ഗവേണൻസ് സർവീസസ് ഇന്ത്യാ ലിമിറ്റഡ് ഡിസ്ട്രിക്ട് മാനേജർ ഹൈൻ മൈക്കിൾ, എന്യൂമറേറ്റർമാർ എന്നിവർ പങ്കെടുത്തു.