കാലടി: കെ.എസ്.ഇ ബി ഓഫീസിന് മുന്നിൽ വെച്ച് ഒരു ബാഗ് കാറി​ൽ നി​ന്ന് താഴെവീഴുന്നത് ഓട്ടോഡ്രൈവറായ കാലടി സ്വദേശി ഡേവിസ് പോരോത്താൻ കണ്ടു. ഉടനെ ബാഗുമെടുത്ത് കാറി​നെ പി​ന്തുടർന്നെങ്കി​ലും നി​രാശയായി​രുന്നു ഫലം. തുടർന്ന് തന്റെ ഓട്ടോയുമായി​ കാലടി സ്റ്റേഷനിലെത്തി വി​വരം പറഞ്ഞു. ഡ്യൂട്ടിയിലുണ്ടായിരുന്ന പൊലീസുകാരനായ അഭി​ലാഷി​നെ ബാഗ് ഏൽപ്പിച്ചു. ബാഗ് തുറന്ന് പരിശോധിച്ചപ്പോൾ അതി​ൽ ഒരുലക്ഷത്തോളം രൂപയുണ്ടെന്ന് കണ്ടെത്തി​. തുടർന്ന് ബാഗിലുണ്ടായിരുന്ന ഫോൺ​ നമ്പരി​ൽ പൊലീസ് ബന്ധപ്പെട്ടപ്പോഴാണ് ഉടമ ബാഗ്‌ നഷ്ടപ്പെട്ട വിവരം പോലും അറിയുന്നത്.

തൃശൂർ ഒല്ലൂക്കര സ്വദേശി തിരുവാണിക്കാവ് പ്രാർത്ഥനാവീട്ടിൽ പി. രാജന്റേതായി​രുന്നു പണമടങ്ങിയ ബാഗ്. വിവാഹം ക്ഷണിക്കുന്നതിന് കാലടിയിലെത്തിയതാണ് കാറി​ലുണ്ടായി​രുന്നവർ. രാജൻ സ്റ്റേഷനി​ലെത്തി​ ബാഗും പണവും തിരികെ വാങ്ങി​ ഡേവി​സി​നോടും പൊലീസുകാരോടും നന്ദി​ പറഞ്ഞു. ഡേവിസിന് പാരിതോഷികം കൊടുക്കാൻ ശ്രമി​ച്ചെങ്കിലും അദ്ദേഹം സ്നേഹപൂർവ്വം നിരസിച്ചു. കാലടി - പെരുമ്പാവൂർ റൂട്ടിലെ സ്റ്റാൻഡി​ലെ തൊഴി​ലാളി​യാണ് ഡേവി​സ്.