കൊച്ചി : വരാപ്പുഴ അതിരൂപതയുടെ പ്രഥമ തദ്ദേശീയ മെത്രാപ്പൊലീത്തയായിരുന്ന ഡോ. ജോസഫ് അട്ടിപ്പേറ്റിയെ 21 ന് ദൈവദാസനായി പ്രഖ്യാപിക്കും. ജോസഫ് അട്ടിപ്പേറ്റിയുടെ ഭൗതികശരീരം അടക്കം ചെയ്തിരിക്കുന്ന എറണാകുളം സെന്റ് ഫ്രാൻസിസ് അസീസി കത്തീഡ്രലിൽ വൈകിട്ട് അഞ്ചിന് നടക്കുന്ന കൃതജ്ഞതാ ദിവ്യബലിയിൽ ആർച്ച് ബിഷപ്പ് ഡോ. ജോസഫ് കളത്തിപ്പറമ്പിൽ പ്രഖ്യാപനം നടത്തും.

അട്ടിപ്പേറ്റിയുടെ 50 -ാം ചരമവാർഷിക വർഷത്തിലാണ് വിശുദ്ധ പദവിയിലേക്കുള്ള നാമകരണത്തിനു മുന്നോടിയായുള്ള ഇൗ പ്രഖ്യാപനം. വിശുദ്ധരുടെ നാമകരണത്തിനായുള്ള വത്തിക്കാൻ തിരുസംഘത്തിന്റെ അനുമതിപത്രം ചടങ്ങിൽ വായിക്കും. കോട്ടപ്പുറം ബിഷപ്പ് ഡോ. ജോസഫ് കാരിക്കശേരി വചനപ്രഘോഷണം നടത്തും. കണ്ണൂർ ബിപ്പപ്പ് ഡോ. അലക്സ് വടക്കുംതല, വിജയപുരം ബിഷപ്പ് ഡോ. സെബാസ്റ്റ്യൻ തെക്കത്തേച്ചേരി എന്നിവർ സഹകാർമ്മികരായിരിക്കും.

ചടങ്ങുകളുടെ ഒരുക്കത്തിനായി അതിരൂപതാ വികാരി ജനറൽമാരായ മാത്യു കല്ലിങ്കൽ, മാത്യു ഇലഞ്ഞിമറ്റം എന്നിവർ ചെയർമാൻമാരായും സെന്റ് ഫ്രാൻസിസ് അസീസി കത്തീഡ്രൽ റെക്ടർ ജോസഫ് പടിയാരംപറമ്പിൽ ജനറൽ കൺവീനറും അഡ്വ. ഷെറി ജെ. തോമസ് ജോയിന്റ് ജനറൽ കൺവീനറുമായ സംഘാടക സമിതി രൂപീകരിച്ചു.