തൃക്കാക്കര: കാക്കനാട് തുതിയൂരിൽ മൂന്ന് കിലോ കഞ്ചാവുമായി ഇതര സംസ്ഥാനക്കാരൻ പിടിയിൽ.ഓഡീഷ സ്വദേശി തപൻ കുമാർ ജെന (38 ) ആണ് പിടിയിലായത്.
ഹിന്ദി സംസാരിക്കുന്ന ഒരാൾ കഞ്ചാവ് വില്പനയ്ക്കായി കാക്കനാട് തുതിയുർ ഭാഗത്ത് എത്തിയിട്ടുണ്ടെന്ന് പൊലീസിന് ലഭിച്ച രഹസ്യ വിവരത്തിന്റെ അടിസ്ഥാനത്തിൽ തൃക്കാക്കര എസ് .ഐ അബ്ദുൽ ജമാൽ,റഫീഖ് എൻ.അഡിഷണൽ എസ്.ഐ റോയ് കെ പുന്നൂസ്,സി.പി.ഓ മാരായ രഞ്ജിത്ത്,സന്തോഷ് എന്നിവരുടെ നേതൃത്വത്തിൽ രണ്ട് സംഘങ്ങളായി തിരിഞ്ഞ് കാക്കനാട് പാലച്ചുവട് , തുതിയൂർ തുടങ്ങിയ സ്ഥലങ്ങളിൽ നിരീക്ഷണം നടത്തിവരുന്നത്. ഇതിനിടയിനാണ് തുതിയൂർ ശ്രീകൃഷ്ണ സ്വാമി ക്ഷേത്രത്തിന് സമീപത്തു വച്ച് പൊലീസിനെ കണ്ട പ്രതി ഓടിരക്ഷപ്പെടാൻ ശ്രമിക്കുന്നതിനിടെ പിടികൂടുന്നത്.പ്രതിയുടെ പക്കലുണ്ടായിരുന്ന ട്രോളി ബാഗിൽ നിന്നും 3 കിലോയോളം കഞ്ചാവ് പൊലീസ് കണ്ടെടുത്തു. പ്രതിയെ ചോദ്യം ചെയ്തതിൽ ഒഡീഷയിൽ നിന്നും കിലോയ്ക്ക് 400 രൂപ നിരക്കിൽ വാങ്ങിക്കൊണ്ടു വരുന്ന കഞ്ചാവ് കാക്കനാട് ഭാഗത്തുള്ള മൊത്ത വില്പനക്കാർക്ക് കൈമാറുമ്പോൾ 800 രൂപ വച്ച് വില കിട്ടുമെന്ന് പറഞ്ഞു.പ്രതിയുടെ പക്കൽ ഉണ്ടായിരുന്ന മൊബൈൽ ഫോണിലേക്ക് വന്നിട്ടുള്ള കോളുകളുടെ വിശദ വിവരങ്ങൾ പരിശോധിച്ച് പ്രതിയുടെ സ്ഥിരം ഇടപാടുകാരെ കണ്ടെത്താൻ ശ്രമിച്ചു വരികയാണ് . ഇതര സംസ്ഥാന തൊഴിലാളികൾ സ്ഥിരമായി യാത്ര ചെയ്യുന്ന ട്രെയിനുകളിൽ കയറുന്ന പ്രതി യാത്രക്കാരുടേതെന്ന് തോന്നിക്കുന്ന തരത്തിൽ ബാഗുകളിലാക്കിയ കഞ്ചാവ് ലോക്കൽ കമ്പാർട്ടുമെന്റിൽ സീറ്റിനടിയിൽ വച്ച ശേഷം ദൂരെ മാറി നിൽക്കാറാണ് പതിവെന്ന് ചോദ്യം ചെയ്യലിൽ പറഞ്ഞു . കാക്കനാട് കോടതിയിൽ ഹാജരാക്കിയ പ്രതിയെ കോടതി റിമാന്റ് ചെയ്തു .