കൊച്ചി: കൊച്ചി കോർപ്പറേഷനിലെ ലൈഫ്, പ്രധാനമന്ത്രി ആവാസ് അർബൻ പദ്ധതി ഗുണഭോക്താക്കളുടെ സംഗമം മേയർ സൗമിനി ജെയിൻ ഉദ്ഘാടനം ചെയ്തു. 1513 ഗുണഭോക്താക്കൾ യോഗത്തിൽ പങ്കെടുത്തു. ഒരു വീട് എന്നതിനപ്പുറം വീടുമായി ബന്ധപ്പെട്ട മറ്റു സൗകര്യങ്ങളും ഒരുക്കുക എന്ന ലക്ഷ്യത്തോടെയാണ് സംഗമം നടത്തുന്നത്.കേന്ദ്ര സംസ്ഥാന സർക്കാരുകൾക്കു കീഴിലുള്ള ജനക്ഷേമ പദ്ധതികളെ കുറിച്ച് ജനങ്ങൾക്ക് അവബോധം നൽകുന്നതിനായി വിവിധ വകുപ്പുകളുടെ ഹെൽപ് ഡെസ്‌കുകൾ ഇതോടനുബന്ധിച്ച് ഒരുക്കിയിരുന്നു . ആധാർ എൻറോൾമെന്റ്, റേഷൻ കാർഡിൽ പേര് ചേർക്കൽ, വൈദ്യുതി കുടിവെള്ള കണക്ഷൻ അപേക്ഷിക്കൽ തുടങ്ങിയവയ്ക്ക് സൗകര്യമൊരുക്കിയിരുന്നു. പട്ടികജാതി വികസനം, ഫിഷറീസ്, സാമൂഹ്യനീതി തുടങ്ങിയ വകുപ്പുകളുടെ കൗണ്ടറുകൾ സജ്ജീകരിച്ചിരുന്നു. വീട് നിർമ്മാണത്തിനാവശ്യമായ ടൈലുകൾ, പൈപ്പ്, ഇലക്ട്രിഫിക്കേഷൻ സാമഗ്രികൾ, പെയിന്റ് തുടങ്ങിയവ 40 മുതൽ 60 ശതമാനം വരെ വിലക്കുറവിൽ സ്റ്റാളുകളിൽ ലഭ്യമാകും.