കൊച്ചി: സുരക്ഷിതമായി താമസിക്കാൻ സ്ത്രീകൾക്ക് ഇനി ഹോസ്റ്റലുകൾ അന്വേഷിച്ച് നടക്കേണ്ട. ഹോസ്റ്റൽ റൂമുകൾ ഇനി സർക്കാരിന്റെ ആപ്പ് ഉപയോഗിച്ച് ബുക്ക് ചെയ്യാം. സംസ്ഥാന വനിതാ വികസന കോർപ്പറേഷനാണ് (കെ.എസ്.ഡബ്ല്യു.ഡി.സി) ഹോട്ടൽ ബുക്കിംഗ് ആപ്പുകളുടെ മാതൃകയിൽ ഷീ സ്റ്റേ എന്ന പേരിൽ ആപ്പ് വികസിപ്പിക്കുന്നത്. പദ്ധതി പ്രാരംഭഘട്ട പ്രവർത്തനങ്ങളിലാണ്. സംസ്ഥാനത്തെ വനിതാ ഹോസ്റ്റലുകൾക്കായി മാനദണ്ഡങ്ങളും തീരുമാനിച്ചിട്ടുണ്ട്. ഇതുമായി ഒത്തുചേരുന്ന ഹോസ്റ്റലുകളുടെ വിവരമാണ് ആപ്പിൽ ലഭ്യമാക്കുന്നത്. 'സ്റ്റേ സേഫ്' പദ്ധതിയുടെ ഭാഗമായാണ് ആപ്പ് വികസിപ്പിക്കുന്നത്.

ഇതിനായി സംസ്ഥാനത്തെ പൊതു-സ്വകാര്യ ഹോസ്റ്റലുകളിൽ 160 എണ്ണത്തെ ഇതിനകം തിരഞ്ഞെടുത്തിട്ടുണ്ട്. യാത്ര ചെയ്യുന്ന സ്ത്രീകൾക്കായി രാത്രി താമസിക്കാൻ എല്ലാ ഹോസ്റ്റലുകളുടേയും വിവരങ്ങൾ ഒരു ആപ്പിന് കീഴിൽ കൊണ്ടുവരാനാണ് ഉദ്ദേശിക്കുന്നതെന്ന് കെ.എസ്.ഡബ്ല്യു.ഡി.സി വൃത്തങ്ങൾ പറഞ്ഞു.

എളുപ്പത്തിലുള്ള ബുക്കിംഗ് രീതിയിലാണ് ആപ്പ് രൂപപ്പെടുത്തുന്നത്. ഒരു പ്രദേശത്ത് എത്തിയാൽ അതിന് സമീപത്തുള്ള ഹോസ്റ്റലുകളെ തിരിച്ചറിയാൻ കഴിയുന്ന ആപ്ലിക്കേഷൻ വികസിപ്പിക്കുന്നതിനായി കേരള സ്റ്റാർട്ടപ്പ് മിഷനു കീഴിൽ രജിസ്റ്റർ ചെയ്തിട്ടുള്ള സ്റ്റാർട്ടപ്പുകൾ താത്പര്യം പ്രകടിപ്പിച്ചിട്ടുണ്ട്. തീയതിയും സ്ഥലവും അടിസ്ഥാനമാക്കി ലഭ്യമായ ഹോസ്റ്റൽ മുറികളും സൗകര്യങ്ങളും അപ്ലിക്കേഷൻ ലിസ്റ്റുചെയ്യും.

160 ഹോസ്റ്റലുകളെ ഷോർട്ട്‌ ലിസ്റ്റ് ചെയ്തിട്ടുണ്ടെങ്കിലും അതിൽ 60 എണ്ണം മാത്രമാണ് വിശദാംശങ്ങൾ നൽകിയിട്ടുള്ളതെന്ന് കെ.എസ്.ഡബ്ല്യു.ഡി.സി ഉദ്യോഗസ്ഥ‌ർ പറഞ്ഞു. 30 ഹോസ്റ്റലുകളുടെ പ്രതിനിധികളുടെ പ്രാഥമിക യോഗം നടന്നു. എല്ലാ ഹോസ്റ്റലുകളെയും തീരുമാനിച്ച് കഴിഞ്ഞാൽ മുറികളുടെ ശുചിത്വത്തിന്റെയും സുരക്ഷയുടെയും മാനദണ്ഡങ്ങൾ നിശ്ചയിച്ച് അവരുമായി കരാറിൽ ഏർപ്പെടാനാണ് തീരുമാനിച്ചിരിക്കുന്നത്.

അറ്റാച്ചുചെയ്ത ബാത്ത് റൂം, ടവലുകൾ, നാപ്കിനുകൾ, സോപ്പ് പോലുള്ള ടോയ്‌ലറ്ററി ഉൽപന്നങ്ങൾ എന്നിവ ഉൾപ്പെടെയുള്ള ഹോട്ടൽ മുറികളുമായി താരതമ്യപ്പെടുത്താവുന്ന സൗകര്യംഹോസ്റ്റലുകളിലും. ഏർപ്പെടുത്താനാണ് ശ്രമം. സർക്കാരിന്റെ കീഴിൽ വരുന്ന ഹോസ്റ്റലുകൾക്ക് പൊതുവായ ഫീസ് നിരക്ക് ഉണ്ടാകും. സ്വകാര്യ ഹോസ്റ്റൽ മുറികളുടെ വാടകനിരക്ക് ഒരു പരിധി വരെ കെ.എസ്.ഡബ്ല്യു.ഡി.സിയാവും നിശ്ചയിക്കുക. ആപ്പിന്റെ ആദ്യപടിയായി മിത്ര എന്ന പേരിൽ ടോൾഫ്രീ ഹെൽപ്പ് ലൈൻ നമ്പർ ലഭ്യമാക്കും.