നെടുമ്പാശേരി: കൊച്ചി രാജ്യാന്തര വിമാനത്താവളത്തിൽ രണ്ട് യാത്രക്കാരിൽ നിന്നായി അനധികൃതമായി കടത്തുവാൻ ശ്രമിച്ച 52 ലക്ഷം രൂപയുടെ ഒന്നരകിലോ സ്വർണം എയർ കസ്റ്റംസ് ഇന്റലിജൻസ് വിഭാഗം പിടികൂടി. ഇന്നലെ പുലർച്ചെ ദുബായിൽ നിന്ന് ഇൻഡിഗോ വിമാനത്തിൽ വന്ന വയനാട് സ്വദേശിയിൽ നിന്ന് ഒരു കിലോയും സൗദി എയർലൈൻസിൽ ജിദ്ദയിൽ നിന്ന് വന്ന മലപ്പുറം സ്വദേശിയിൽ നിന്ന് അരകിലോ സ്വർണവുമാണ് പിടികൂടിയത്. ഒരു കിലോ സ്വർണം മിക്‌സിയുടെ മോട്ടോറിൽ ഉരുക്കി ഒഴിച്ച് നിലയിലായിരുന്നു. അര കിലോ സ്വർണം ബ്ലൂടൂത്ത് സ്പീക്കറിൽ ഒളിപ്പിച്ച നിലയിലുമാണ് കസ്റ്റംസ് കണ്ടെത്തിയത്.