തൃശൂർ: കേരളത്തിന് 2000 മെഗാ വാട്ട് വൈദ്യുതി കൂടി കേന്ദ്ര പൂളിൽ നിന്ന് ലഭിക്കാനുള്ള എച്ച്.വി.ഡി.സി ലൈൻ കമ്മിഷനിംഗിന് മുന്നോടിയായുള്ള ട്രയൽ റൺ നടത്തുന്നതിനാൽ ജനുവരി 28, 29 തീയതികളിൽ കുതിരാനിൽ ഗതാഗത നിയന്ത്രണം ഏർപ്പെടുത്തും.

എറണാകുളം ഭാഗത്ത് നിന്ന് കുതിരാൻ വഴി കടന്നു പോകേണ്ട മൾട്ടി ആക്‌സിൽ ട്രെയിലറുകൾ, ഫ്യൂവൽ ബുള്ളറ്റുകൾ, 12 ടണ്ണിൽ അധികമുളള ഹെവി വാഹനങ്ങൾ എന്നിവ രാവിലെ അഞ്ച് മണി മുതൽ വൈകിട്ട് അഞ്ച് മണി വരെ തടയും.
സ്വകാര്യ, ലൈറ്റ് മോട്ടോർ വാഹനങ്ങൾ ഈ സമയത്ത് മണ്ണുത്തി, വടക്കാഞ്ചേരി, ചേലക്കര, പഴയന്നൂർ വഴി തിരിച്ചു വിടും. പാസഞ്ചർ വാഹനങ്ങൾ, ട്രാൻസ്‌പോർട്ട് ബസുകൾ, അടിയന്തര സർക്കാർ വാഹനങ്ങൾ എന്നിവ കുതിരാൻ വഴി കടത്തിവിടും.
യാത്രകൾ ഈ തീയതികളിൽ കഴിയുന്നതും ഒഴിവാക്കാൻ തൃശൂർ കളക്ടർ എസ്.ഷാനവാസ് അഭ്യർത്ഥിച്ചു.

• വിവരങ്ങൾക്ക്: 8547614417 (വില്ലേജ് ഓഫീസർ, പീച്ചി), 8547614415 (വില്ലേജ് ഓഫീസർ, പാണഞ്ചേരി)

1.2 കിലോമിറ്റർ ഭൂഗർഭ കേബിൾ
പുഗളൂർ- തൃശൂർ എച്ച്.വി.ഡി.സി ലൈൻ കമ്മിഷൻ ചെയ്യാൻ 1.2 കിലോമിറ്റർ ഭൂഗർഭ കേബിൾ കൂടി സ്ഥാപിക്കലാണ് പുരോഗമിക്കുന്നത്. 4500 കോടി രൂപ ചെലവിൽ കമ്മിഷൻ ചെയ്യേണ്ടുന്ന എച്ച്.വി.ഡി.സി ലിങ്കിന്റെ ഭാഗമായുള്ള സ്റ്റേഷൻ തൃശൂർ മാടക്കത്തറയിൽ തയ്യാറായി കഴിഞ്ഞു. 19000 കോടി രൂപ ചെലവിട്ട് പൂർത്തിയായ എച്ച്.വി.ഡി.സി സംവിധാനം ഉത്തരകേരളത്തിലെ സായാഹ്ന വോൾട്ടേജ് ക്ഷാമം പരിഹരിക്കാനുളള പദ്ധതിയാണ്.