കിഴക്കമ്പലം: ജനകീയ കൂട്ടായ്മയായ ട്വന്റി20യുടെ വിവിധ പ്രവർത്തനങ്ങളെക്കുറിച്ച് മനസിലാക്കുന്നതിന് സ്വി​റ്റ്‌സർലൻഡ് എം.പി മാർക്കസ് ഏബി കിഴക്കമ്പലത്ത് എത്തി. പഞ്ചായത്തിലെ തോടുകളിലെ തടയണകൾ, ആടുഗ്രാമം, കോഴി ഫാം, മത്സ്യക്കൃഷി, ഗോഡ്‌സ് വില്ല എന്നിവ സന്ദർശിച്ചു കർഷകരുമായി സംസാരിച്ചു. സ്വി​റ്റ്‌സർലൻഡുമായി സഹകരിച്ച് കിഴക്കമ്പലത്തെ പാലുൽപാദനത്തിന്റെ ഹബ് ആക്കി മാ​റ്റുവാൻ ധാരണ ആയതായി ചീഫ് കോഓർഡിനേ​റ്റർ സാബു.എം.ജേക്കബ് പറഞ്ഞു. ഓരോ കുടുംബത്തിനും 25 മുതൽ 40 വരെ എണ്ണമുള്ള കന്നുകാലികൾ ഉൾപ്പെട്ട യൂണി​റ്റ് ആരംഭിക്കും. പാലും, പാൽ ഉല്പന്നങ്ങളും ഗുണം ചോർന്നു പോകാതെ ആധുനിക സാങ്കേതിക വിദ്യ ഉപയോഗിച്ച് വേർ തിരിക്കുന്ന യൂണി​റ്റുകൾ പഞ്ചായത്തിൽ ആരംഭിക്കുവാനാണ് പദ്ധതി. പഞ്ചായത്തിലെ പാവപ്പെട്ടവർക്ക് ട്വന്റി20യിലൂടെ ഉയർന്ന ജീവിത നിലവാരം ലഭിക്കുന്നുണ്ട്. തുടർന്നും സ്വി​റ്റ്‌സർലൻഡിൽ നിന്നുള്ള മന്ത്റി സംഘവും കിഴക്കമ്പലത്ത് എത്തി തുടർ ചർച്ചകൾ നടത്തുമെന്ന് അദ്ദേഹം പറഞ്ഞു.