കൊച്ചി: ലിസി മെട്രോ സ്റ്റേഷന്റെ പേര് ടൗൺ ഹാൾ മെട്രോ സ്റ്റേഷനായി മാറ്റാനുള്ള കൊച്ചി മെട്രോ റെയിൽ ലിമിറ്റഡിന്റെ (കെ.എം.ആർ.എൽ )നിർദേശത്തിന് സംസ്ഥാന സർക്കാർ അംഗീകാരം നൽകി. ഫെബ്രുവരി ഒന്നു മുതൽ പുതിയ പേര് പ്രാബല്യത്തിൽ വരും. നോർത്ത് റെയിൽവേ സ്റ്റേഷനും എറണാകുളം ടൗൺഹാളിനും സമീപമായാണ് നിലവിലെ ലിസി മെട്രോ സ്റ്റേഷൻ. നിലവിലെ പേര് മറ്റ് മെട്രോ സ്റ്റേഷനുകളുമായി യോജിക്കുന്നുണ്ടെന്ന് ഉറപ്പുവരുത്തുന്നതിനാണ് പുതിയ പേര് നിർദേശിച്ചതെന്നും സ്റ്റേഷന്റെ ഭൂമിശാസ്ത്രപരമായ സ്ഥാനവും പുതിയ പേരിനായി പരിഗണിച്ചെന്നും കെ.എം.ആർ.എൽ എം.ഡി അൽകേഷ് കുമാർ ശർമ്മ പറഞ്ഞു. പേര് മാറ്റത്തിന് കെ.എം.ആർ.എൽ ഡയറക്ടർ ബോർഡ് നേരത്തെ അംഗീകാരം നൽകിയിരുന്നു. തുടർന്ന് ഇത് സംസ്ഥാന സർക്കാരിന്റെ അംഗീകാരത്തിനായി അയക്കുകയായിരുന്നു. ട്രെയിൻ പ്രഖ്യാപനങ്ങൾ, മെട്രോ സ്‌റ്റേഷനുകൾക്കുള്ളിലെ മാപ്പുകൾ, നെയിം ബോർഡ്, സൂചന ബാർഡുകൾ തുടങ്ങി ഇനിയുള്ള എല്ലാ ആശയവിനിമയങ്ങളും ടൗൺ ഹാൾ മെട്രോ സ്റ്റേഷനെന്ന പേരിലായിരിക്കുമെന്ന് കെ.എം.ആർ.എൽ അറിയിച്ചു.