ആലുവ: നഗരസഭയ്ക്ക് അടയ്‌ക്കേണ്ട ലൈസൻസ് ഫീസ് ഏഴിരട്ടി വർദ്ധിപ്പിച്ച് വ്യാപാരികൾക്ക് ആലുവ നഗരസഭയുടെ വക ഇരുട്ടടി. കഴിഞ്ഞവർഷം ലൈസൻസ് പുതുക്കാത്തവർക്കാണ് നഗരസഭ ഉദ്യോഗസ്ഥർ പിഴയും പിഴപ്പലിശയും ഈടാക്കിയുള്ള നടപടി.

രണ്ടായിരം രൂപ അടക്കേണ്ടവർക്ക് ലേറ്റ് ഫീ എന്നിനത്തിൽ 10763 രൂപയും പിഴയായി 2000 രൂപയും എഴുത്തുകൂലിയായി 10 രൂപയുമാണ് നൽകിയിരിക്കുന്നത്. ആകെ 14823 രൂപയാണ് വ്യാപാരി നൽകേണ്ടത്. ഇതുപോലെ ലൈസൻസ് തുക അടയ്ക്കാൻ മുടങ്ങിയവർ വൻതുക അടയ്ക്കാൻ നിർബന്ധിതരായിരിക്കുകയാണ്. അതിനിടയിൽ നഗരസഭയിൽ കടുത്ത സാമ്പത്തിക പ്രതിസന്ധിയായതോടെ ജീവനക്കാരുടെ ശമ്പളം ഇത്തവണയും മുടങ്ങുമെന്നുറപ്പായി. ഇതിനാലാണ് നഗരസഭ ജീവനക്കാർ വൻപിഴ ഈടാക്കി നികുതി പിരിവിനിറങ്ങുന്നതെന്ന് ആക്ഷേപമുണ്ട്.