വണ്ടിപ്പെരിയാർ: അഴുത ബ്ലോക്ക് പഞ്ചായത്തുതല ലൈഫ് മിഷൻ ഗുണഭോക്താക്കളുടെ കുടുംബസംഗമവും അദാലത്തും ഇന്ന് വണ്ടിപ്പെരിയാറ്റിൽ നടക്കും. രാവിലെ പത്തിന് വണ്ടിപ്പെരിയാർ പഞ്ചായത്ത് കമ്യൂണിറ്റി ഹാളിൽ നടക്കുന്ന ഗുണഭോക്തൃ കുടുംബ സംഗമം ഇ. എസ് ബിജിമോൾ എംഎൽഎ ഉദ്ഘാടനം ചെയ്യും. ബ്ലോക്ക് പഞ്ചായത്ത് പ്രസിഡന്റ് ആലീസ് സണ്ണി അദ്ധ്യക്ഷത വഹിക്കും.
അഴുത ബ്ലോക്ക് പരിധിയിൽ വരുന്ന കുമളി, വണ്ടിപ്പെരിയാർ, പെരുവന്താനം, ഏലപ്പാറ, കൊക്കയാർ, പീരുമേട് എന്നീ ആറ് ഗ്രാമപഞ്ചായത്തുകളിലായി ഇതിനകം 1500ലധികം വീടുകൾ നിർമാണം പൂർത്തീകരിച്ചിട്ടുണ്ട്.
ജില്ലാ കലക്ടർ എച്ച്. ദിനേശൻ മുഖ്യപ്രഭാഷണം നടത്തും. ബ്ലോക്ക് പഞ്ചായത്ത് സെക്രട്ടറി വി. ആർ മോനിഷ് റിപ്പോർട്ട് അവതരിപ്പിക്കും. ലൈഫ് മിഷൻ ജില്ലാ കോർഡിനേറ്റർ കെ പ്രവീൺ വിഷയാവതരണവും നടത്തും. വണ്ടിപ്പെരിയാർ ഗ്രാമപഞ്ചായത്ത് പ്രസിഡന്റ് ശാന്തി ഹരിദാസ് സ്വാഗതവും ബ്ലോക്ക് പഞ്ചായത്ത് ജോയിന്റ് ബി ഡി ഒ ദിലീപ്.എം.കെ. നന്ദിയും പറയും.ഉദ്ഘാടന യോഗത്തിനു ശേഷം കേന്ദ്രസംസ്ഥാന സർക്കാരുകളുടെ വിവിധ ക്ഷേമപദ്ധതികളുടെ വിശദീകരണവും വിവിധ സർക്കാർ വകുപ്പുകളുടെ കൗണ്ടറുകൾ തിരിച്ചുള്ള അദാലത്തും സംഘടിപ്പിച്ചിട്ടുണ്ട്.