തൊടുപുഴ: ദേശീയ യുവജന ദിനാഘോഷം ജില്ലാതല ഉദ്ഘാടനം തൊടുപുഴ അർബൻ ബാങ്ക് ഓഡിറ്റോറിയത്തിൽ ഞായറാഴ്ച്ച രാവിലെ 9.30ന് ഡീൻ കുര്യാക്കോസ് എം.പി നിർവ്വഹിക്കും. നഗരസഭാ അദ്ധ്യക്ഷ പ്രൊഫ. ജെസ്സി ആന്റണി അദ്ധ്യക്ഷത വഹിക്കും. സാംസ്‌കാരികോത്സവം മാമാങ്കം 2020 ഉം യൂത്ത് ക്ലബുകൾക്കുള്ള അവാർഡ് വിതരണവും ജില്ലാ പഞ്ചായത്ത് പ്രസിഡന്റ് കൊച്ചുത്രേസ്യ പൗലോസും സ്‌പോർട്‌സ് കിറ്റുകളുടെ വിതരണം ജില്ലാ ഇൻഫർമേഷൻ ഓഫീസർ എൻ. സതീഷ് കുമാറും നിർവ്വഹിക്കും. എൻ.വൈ.കെ കോഓർഡിനേറ്റർ കെ. ഹരിലാൽ, പ്രോഗ്രാം ഓഫീസർ വി.എസ്. ബിന്ദു, എൻ.എസ്.എസ് പ്രോഗ്രാം കോഓർഡിനേറ്റർ പ്രൊഫ. ജിതിൻ ജോയ്, യൂത്ത് ക്ലബ് പ്രസിഡന്റ് എൻ. രവീന്ദ്രൻ, നിഖിൽ മുരളി എന്നിവർ സംബന്ധിക്കും. ദിനാഘോഷത്തോടനുബന്ധിച്ച് യൂത്ത് സെമിനാർ, സാംസ്‌കാരിക മത്സരങ്ങൾ എന്നിവ ഉണ്ടാകും. കേന്ദ്ര കായിക യുവജനകാര്യ മന്ത്രാലയത്തിന്റെ നെഹ്‌റുയുവകേന്ദ്രയാണ് യുവജനാഘോഷം സംഘടിപ്പിക്കുന്നത്.