കുമളി: ജില്ലാ ലൈബ്രറി കൗൺസിലും പെരിയാർ ടൈഗർ റിസർവും സംയുക്തമായി സംഘടിപ്പിക്കുന്ന ജില്ലാ സാഹിത്യ ക്യാമ്പ് 'എഴുത്തും കാലവും കാടകത്തൊരൊത്തുചേരൽ' പരിപാടിക്ക് ഇന്ന് തേക്കടിയിൽ തുടക്കമാകും.
തേക്കടി ബാംബുഗ്രോവിൽ രാവിലെ 11ന് നടക്കുന്ന ജില്ലാ സാഹിത്യക്യാമ്പ് സംസ്ഥാന ലൈബ്രറി കൗൺസിൽ പ്രസിഡന്റ് ഡോ. കെ വി കുഞ്ഞികൃഷ്ണൻ ഉദ്ഘാടനം ചെയ്യും. ജില്ലാ ലൈബ്രറി കൗൺസിൽ പ്രസിഡന്റ് ആർ തിലകൻ അദ്ധ്യക്ഷനാകും. ഫീൽഡ് ഡയറക്ടർ കെ ആർ അനൂപ് മുഖ്യപ്രഭാഷണം നടത്തും. പെരിയാർ ടൈഗർ റിസർവ് ഡെപ്യൂട്ടി ഡയറക്ടർ ശിൽപാ വി കുമാർ സംസാരിക്കും. രണ്ട് ദിവസമായി നടക്കുന്ന പരിപാടിയിൽ ഏഴാച്ചേരി രാമചന്ദ്രൻ, കുരീപ്പുഴ ശ്രീകുമാർ, ജോസ് കോനാട്ട് എന്നിവർ പങ്കെടുക്കും. ബ്ലോക്ക് പഞ്ചായത്ത് അംഗം കെ എ അബ്ദുൾ റസാഖ് വരച്ച 230 ലോക രാഷ്ട്ര തലവന്മാരുടെ ചിത്രങ്ങളടങ്ങിയ രണ്ട് പുസ്തങ്ങളുടെ പ്രകാശനവും നടക്കും.
ജില്ലയിലെ കഥ, കവിത, നോവൽ തുടങ്ങിയ വിവിധ മേഖലകളിലായി പുസ്തകം പ്രസിദ്ധീകരിച്ചിരിക്കുന്ന നാൽപതോളം എഴുത്തുകാരാണ് ദ്വിദിന പരിപാടിയിൽ പങ്കെടുക്കുമെന്ന് ജില്ലാ ലൈബറി കൗൺസിൽ സെക്രട്ടറി ഇ .ജി .സത്യൻ അറിയിച്ചു.