കാസർകോട്: കഞ്ചാവ് സിഗരറ്റ് വലിക്കുന്നതിനിടെ ബൈക്ക് മോഷണ കേസിലെ പ്രതിയുൾപ്പെടെ രണ്ടു പേരെ പൊലീസ് അറസ്റ്റുചെയ്തു. ബൽപ്പത്തടുക്കയിലെ മൊയ്തീൻ കുഞ്ഞി (30), ദീപക് (21) എന്നിവരെയാണ് ബദിയടുക്ക പൊലീസ് അറസ്റ്റുചെയ്തത്. കഴിഞ്ഞ രാത്രി ബൽപ്പത്തടുക്ക ബസ് വെയിറ്റിംഗ് ഷെഡിൽ കഞ്ചാവ് നിറച്ച സിഗരറ്റ് വലിക്കുകയായിരുന്ന രണ്ടു പേരെയും വിവരമറിഞ്ഞെത്തിയ പൊലീസ് പിടികൂടുകയായിരന്നു. ഇവരിൽ നിന്ന് നാല് ഗ്രാം കഞ്ചാവും പിടിച്ചെടുത്തു. രണ്ട് ബൈക്കുകൾ മോഷ്ടിച്ച കേസിൽ പ്രതിയാണ് ദീപക്കെന്ന് പൊലീസ് പറഞ്ഞു. മോഷ്ടിച്ച ബൈക്കിൽ കഞ്ചാവ് കടത്തുന്നതിനിടെയാണ് ഒരു തവണ ദീപക് പൊലീസ് പിടിയിലായത്.

ചാരായക്കടത്ത് കേസിലെ പിടികിട്ടാപ്പുള്ളി

17 വർഷത്തിന് ശേഷം അറസ്റ്റിൽ

കാസർകോട്: കാറിൽ ചാരായം കടത്തിയ കേസിലെ പിടികിട്ടാപ്പുള്ളി 17 വർഷത്തിന് ശേഷം അറസ്റ്റിൽ. കാസർകോട് ബങ്കരക്കുന്നിലെ ബദറുദ്ദീനെയാണ് (47) ബദിയടുക്ക പൊലീസ് അറസ്റ്റ് ചെയ്തത്. 2003 ൽ ബദിയടുക്കയിൽ കാറിൽ ചാരായം കടത്തുന്നതിനിടെ ബദറുദ്ദീൻ പൊലീസ് പിടിയിലായിരുന്നു. കോടതിയിൽ നിന്നും ജാമ്യമെടുത്ത ശേഷം ബദറുദ്ദീൻ മുങ്ങുകയാണുണ്ടായത്. ഇതേ തുടർന്ന് കോടതി നിരവധി തവണ വാറണ്ട് അയച്ചെങ്കിലും പ്രതി ഹാജരായില്ല. മുംബൈയിലും മറ്റും ഒളിവിൽ കഴിഞ്ഞ ബദറുദ്ദീൻ കഴിഞ്ഞ ദിവസം നാട്ടിലെത്തിയ വിവരമറിഞ്ഞതോടെ പൊലീസ് പിടികൂടുകയായിരുന്നു.