മാഹി: ഇന്ത്യയിലും കേരളത്തിലുമുള്ളത് രണ്ട് ഏകാധിപതികളുടെ ഭരണമാണെന്ന് പ്രതിപക്ഷനേതാവ് രമേശ് ചെന്നിത്തല പറഞ്ഞു. പൗരത്വ ഭേദഗതിക്കെതിരെയും കേന്ദ്ര-സംസ്ഥാന സർക്കാരുകളുടെ ജനദ്രോഹനയങ്ങൾക്കെതിരെയും കണ്ണൂർ ജില്ലാ കോൺഗ്രസ് പ്രസിഡന്റ് സതീശൻ പാച്ചേനി നടത്തുന്ന സഹനസമര പദയാത്രയുടെ ഉദ്ഘാടനം നിർവഹിക്കുകയായിരുന്നു അദ്ദേഹം. ഇന്ത്യ ഗുരുതരമായ സാമ്പത്തിക തകർച്ച നേരിടുകയാണ്. ജനങ്ങളുടെ കൈയിൽ പണമില്ലാത്ത അവസ്ഥ കൂടുകയാണ്. അന്തർദേശീയ രംഗത്ത് ഇന്ത്യയുടെ വില താഴ്ന്നിരിക്കുകയാണ്. ഇതിൽ നിന്നെല്ലാം ജനങ്ങളുടെ ശ്രദ്ധ തിരിച്ചുവിടാനാണ് മുത്തലാഖ്, പൗരത്വ ഭേദഗതി എന്നിവ കൊണ്ട് നേരിടുന്നത്. ഗവർണറുടെ മുന്നിൽ മുട്ട് മടക്കുന്ന മുഖ്യമന്ത്രിയെയല്ല നമുക്ക് വേണ്ടത്. എല്ലാ മേഖലകളിലും കമ്മ്യൂണിസ്റ്റ് പാർട്ടിക്കാരെ തിരുകിക്കയറ്റുകയാണെന്നും ചെന്നിത്തല ആരോപിച്ചു.