കോഴിക്കോട്: പട്ടികവർഗ വികസന വകുപ്പിന്റെ കീഴിലുളള മോഡൽ റസിഡൻഷ്യൽ സ്കൂളുകളിലും പ്രീ മെട്രിക് ഹോസ്റ്റലുകളിലും പഠിക്കുന്ന കുട്ടികളുടെ സംസ്ഥാന തല കലാമേളയായ സർഗോത്സവം ഈസ്റ്റ്ഹിൽ ഗവ. ഫിസിക്കൽ എഡ്യുക്കേഷൻ കോളേജ് ഗ്രൗണ്ടിൽ നാളെ തുടങ്ങുമെന്ന് ജില്ലാ കളക്ടർ എസ്.സാംബശിവ റാവു വാർത്താ സമ്മേളനത്തിൽ പറഞ്ഞു. നാളെ രാവിലെ 8.30 ന് കാരപ്പറമ്പ് ജംഗ്‌ഷനിൽ നിന്നാരംഭിക്കുന്ന സാംസ്കാരിക ഘോഷയാത്രയോടെ കലോത്സവ വേദി ഉണരും.മൂന്നു ദിവസം നീളുന്ന കലോത്സവത്തിന്റെ ഉദ്ഘാടനം ഞായറാഴ്ച തൊഴിൽ മന്ത്രി ടി.പി.രാമകൃഷ്ണൻ നിർവഹിക്കും. എ.പ്രദീപ് കുമാർ എം.എൽ.എ അദ്ധ്യക്ഷത വഹിക്കും. സമ്മാനദാനം തിങ്കളാഴ്ച വൈകീട്ട് അഞ്ചിന് മന്ത്രി എ.കെ.ബാലൻ നിർവഹിക്കും.

പരമ്പരാഗത ഗോത്ര നൃത്തം , ഗോത്ര ഗാനം, സംഘ നൃത്തം, നാടോടി നൃത്തം, നാടകം തുടങ്ങിയവയാണ് മത്സരയിനങ്ങൾ.വിജയികൾക്ക് ഗ്രേസ് മാർക്കും ലഭിക്കും. 20 മോഡൽ മോഡൽ റസിഡൻഷ്യൽ സ്കൂളിൽ നിന്നും 114 പ്രീമെട്രിക് ഹോസ്റ്റലിൽ നിന്നുമെത്തുന്ന ആയിരത്തി അഞ്ഞൂറോളം വിദ്യാർത്ഥികളാണ് സർഗോത്സവത്തിൽ പങ്കെടുക്കുക. സീനിയർ വിഭാഗത്തിൽ 19 ഇനങ്ങളിലും ജൂനിയർ വിഭാഗത്തിൽ 12 ഇനങ്ങളിലുമാണ് മത്സരം. മത്സരത്തിനെത്തുന്നവർക്കും അനുഗമിക്കുന്നവർക്കും 14 സെന്ററുകളിലായി താമസസൗകര്യം ഏർപ്പെടുത്തിയിട്ടുണ്ട്. കോഴിക്കോട് ഇൻറർനാഷണൽ ടൂറിസ്റ്റ് ഹോം, കാസിയ അപ്പാർട്ടുമെൻറ്, ആനന്ദഭവൻ ടൂറിസ്റ്റ് ഹോം, കിർത്താഡ്സ് ഹോസ്റ്റൽ എന്നിവിടങ്ങളിലാണ് സൗകര്യമൊരുക്കിയിരിക്കുന്നത്.മത്സരത്തിന് തലേ ദിവസമുൾപ്പെടെ നാലു ദിവസവും ഭക്ഷണശാലയും പ്രവർത്തിക്കും. പട്ടികവർഗ വികസന വകുപ്പ് ഡെപ്യൂട്ടി ഡയറക്റ്റർ വി.ശശീന്ദ്രൻ ,പട്ടികവർഗ വികസന ഓഫീസർ സെയ്ദ് നയീം എന്നിവരും വാർത്താ സമ്മേളനത്തിൽ പങ്കെടുത്തു.