11,227 കുടുംബങ്ങൾ ഒത്ത്ചേരും
ആദ്യ കുടുംബസംഗമം മാനന്തവാടിയിൽ

കൽപ്പറ്റ: സംസ്ഥാന സർക്കാരിന്റെ സമ്പൂർണ പാർപ്പിട പദ്ധതിയായ ലൈഫ് മിഷൻ ഗുണഭോക്താക്കളുടെ ഒത്തുചേരലുകൾക്ക് ഇന്ന് (ജനുവരി 10) ജില്ലയിൽ തുടക്കമാകും. മാനന്തവാടി ബ്ലോക്ക് പഞ്ചായത്തിലാണ് ജില്ലയിലെ ആദ്യത്തെ കുടുംബ സംഗമം നടക്കുന്നത്. ബ്ലോക്ക്, നഗരസഭാതലങ്ങളിൽ നടക്കുന്ന കുടുംബസംഗമങ്ങളിൽ ഗുഭോക്താക്കൾക്കായി പ്രത്യേകം അദാലത്തും ഒരുക്കിയിട്ടുണ്ട്. ജില്ലയിൽ ആകെ 11,227 കുടുംബങ്ങൾക്കാണ് ലൈഫ് പദ്ധതിയിലൂടെ വീടുകൾ ലഭിച്ചത്. ലൈഫ് മിഷൻ പദ്ധതിയിലൂടെ സംസ്ഥാനത്ത് രണ്ട് ലക്ഷം വീടുകൾ പൂർത്തിയാക്കിയതിന്റെ ഔദ്യോഗിക പ്രഖ്യാപനം ജനുവരി 26 നു മുഖ്യമന്ത്രി പിണറായി വിജയൻ തിരുവനന്തപുരത്ത് നടത്തും. ഇതിനു മുന്നോടിയായാണ് ജില്ലകളിൽ ഗുണഭോക്താക്കളുടെ സംഗമം നടത്തുന്നത്.

തദ്ദേശഭരണ സ്ഥാപനങ്ങൾ, സിവിൽ സപ്ലൈസ്, കൃഷി, സാമൂഹ്യ നീതി, ഐ.ടി, ഫിഷറീസ്, വ്യവസായം, പട്ടിക ജാതി പട്ടിക വർഗ വികസനം, ക്ഷീര വികസനം, ആരോഗ്യം, റവന്യൂ, ശുചിത്വ മിഷൻ, വനിതാ ശിശു വികസനം, ഗ്രാമ വികസനം, പബ്ലിക് റിലേഷൻസ് തുടങ്ങിയ വകുപ്പുകളും കുടുംബശ്രീ, ലീഡ് ബാങ്ക്, മഹാത്മാഗാന്ധി ദേശീയ ഗ്രാമീണ തൊഴിലുറപ്പ് പദ്ധതി തുടങ്ങിയ സ്ഥാപനങ്ങളും ഗുഭോക്താക്കൾക്കായി വിവിധ സേവനങ്ങളൊരുക്കി അദാലത്തിൽ സജീവമാകും. വീടുകൾക്കൊപ്പം ഗുഭോക്താക്കൾക്ക് ജീവിതോപാധികളും കണ്ടെത്തി നൽകുകയാണ് അദാലത്തിലൂടെ ലക്ഷ്യമിടുന്നത്. ആക്ഷയ കേന്ദ്രങ്ങളിലൂടെ ലഭിക്കുന്ന സേവനങ്ങളും അദാലത്തിൽ ലഭ്യമാവും.

മാനന്തവാടി ബ്ലോക്കിലെ കുടുംബ സംഗമവും അദാലത്തും ഇന്ന് (ജനുവരി 10) രാവിലെ 10 ന് അമ്പുകുത്തി സെന്റ് തോമസ് ചർച്ച് ഹാളിൽ കൃഷി വകുപ്പ് മന്ത്രി വി. എസ് സുനിൽ കുമാർ ഉദ്ഘാടനം ചെയ്യും. ഒ.ആർ.കേളു എം.എൽ.എ. അധ്യക്ഷത വഹിക്കും. ജില്ലാ പഞ്ചായത്ത് പ്രസിഡന്റ് കെ.ബി.നസീമ, ബ്ലോക്ക് പഞ്ചായത്ത് പ്രസിഡന്റ് ഗീത ബാബു, ജനപ്രതിനിധികൾ, രാഷ്ട്രീയ പാർട്ടി പ്രതിനിധികൾ തുടങ്ങിയവർ പങ്കെടുക്കും. മാനന്തവാടി ബ്ലോക്കിൽ ഒന്നാം ഘട്ടത്തിൽ 1697 വീടുകളാണ് പൂർത്തീകരിച്ചത്. രണ്ടാം ഘട്ടത്തിൽ 1124 വീടുകളിൽ 580 വീടുകൾ പൂർത്തിയായി. മാനന്തവാടി ബ്ലോക്കിൽ 2277 വീടുകളാണ് ആകെ പൂർത്തികരിച്ചത്.

ജില്ലയിലെ മറ്റ് ബ്ലോക്ക്, നഗരസഭാതല കുടുംബസംഗമങ്ങളുടെ തീയ്യതികളും നിശ്ചയിച്ചു. കൽപ്പറ്റ നഗരസഭ കുടുംബ സംഗമം ജനുവരി 11 നു ചന്ദ്രഗിരി ഓഡിറ്റോറിയത്തിൽ വൈദ്യൂതി മന്ത്രി എം. എം മണി ഉദ്ഘാടനം ചെയ്യും. കൽപ്പറ്റ ബ്ലോക്കിന്റെ സംഗമം ചന്ദ്രഗിരി ഓഡിറ്റോറിയത്തിൽ ജനുവരി 13 നു തൊഴിൽ വകുപ്പ് മന്ത്രി ടി. പി രാമകൃഷ്ണൻ ഉദ്ഘാടനം ചെയ്യും. മാനന്തവാടി മുനിസിപ്പാലിറ്റിയുടെ സംഗമം കമ്മ്യൂണിറ്റി ഹാളിൽ ജനുവരി 13 നു തൊഴിൽ വകുപ്പ് മന്ത്രി ടി.പി രാമകൃഷ്ണൻ ഉദ്ഘാടനം ചെയ്യും. പനമരം ബ്ലോക്കിന്റെ കുടുംബ സംഗമം ജനുവരി 14 നു നടവയൽ കെ.ജെ.എസ് ഓഡിറ്റോറിയത്തിലും സുൽത്താൻ ബത്തേരി ബ്ലോക്കിന്റെ സംഗമം അന്ന് എടത്തറ ഓഡിറ്റോറിയത്തിലും തുറമുഖ,പുരാവസ്തു പുരാരേഖാ വകുപ്പ് മന്ത്രി രാമചന്ദ്രൻ കടന്നപ്പള്ളി ഉദ്ഘാടനം ചെയ്യും. സുൽത്താൻ ബത്തേരി നഗരസഭയുടെ കുടുംബസംഗമം 21 ന് നടക്കും.