# യൂക്കോ ബാങ്ക് ധാരണാപത്രം ഒപ്പുവച്ചു
# വായ്പ 15 ധനകാര്യ സ്ഥാപനങ്ങൾ വഴി
# പ്രയോജനം 4600 ഓളം ശാഖകളിലൂടെ
# പത്ത് ലക്ഷം രൂപ വരെയുള്ള ഈടില്ലാതെ

# 15% വരെ മൂലധന സബ്‌സിഡി നൽകും

# കൃത്യമായ തിരിച്ചടവിന് 3% പലിശ സബ്‌സിഡി

# 800 ഓളം പേർ ഗുണഭോക്താക്കൾ

കോഴിക്കോട്: പ്രവാസി പുനരധിവാസത്തിനായുള്ള നോർക്ക ഡിപ്പാർട്ട്‌മെന്റ് പ്രോജക്ട് ഫോർ റിട്ടേൺ എമിഗ്രന്റ്‌സ് പദ്ധതിയിൻ കീഴിൽ നോർക്ക റൂട്ട്‌സ് പ്രമുഖ ദേശസാൽകൃത ബാങ്കായ യൂക്കോ ബാങ്കുമായി ധാരണാപത്രം ഒപ്പുവച്ചു. നോർക്ക റൂട്ട്‌സ് ആസ്ഥാന കാര്യാലയത്തിൽ നടന്ന ചടങ്ങിൽ നോർക്ക റൂട്ട്‌സ് ചീഫ് എക്‌സിക്യൂട്ടീവ് ഓഫീസർ കെ. ഹരികൃഷണൻ നമ്പൂതിരിയും, യൂക്കോ ബാങ്ക് ചീഫ് മാനേജർ പി. വിജയ് അവിനാഷും ധാരാണാപത്രം കൈമാറി.

പദ്ധതിയിൻ കീഴിൽ സ്റ്റേറ്റ് ബാങ്ക് ഒഫ് ഇന്ത്യ, യൂണിയൻ ബാങ്ക് ഒഫ് ഇന്ത്യ, സൗത്ത് ഇന്ത്യൻ ബാങ്ക്, കേരള സംസ്ഥാന പിന്നോക്ക വിഭാഗ വികസന കോർപ്പറേഷൻ, കേരള സംസ്ഥാന സഹകരണ കാർഷിക ഗ്രാമവികസന ബാങ്ക്, കേരള സംസ്ഥാന പട്ടികജാതി/വർഗ്ഗ വികസന കോർപ്പറേഷൻ, കേരള സംസ്ഥാന പ്രവാസി ക്ഷേമ വികസന സഹകരണ സംഘം(മലപ്പുറം), ബാങ്ക് ഒഫ് ബറോഡ, സിൻഡിക്കേറ്റ് ബാങ്ക്, ഫെഡറൽ ബാങ്ക്, കേരള ഫിനാൻഷ്യൽ കോർപ്പറേഷൻ, ഇന്ത്യൻ ഓവർസീസ് ബാങ്ക്, കോഴിക്കോട് ജില്ലാ സഹകരണ ബാങ്ക്, ബാങ്ക് ഒഫ് ഇന്ത്യ എന്നീ ധനകാര്യ സ്ഥാപനങ്ങളുമായും ധാരാണാ പത്രം ഒപ്പ് വച്ചിട്ടുണ്ട്.

യൂക്കോ ബാങ്കിന് സംസ്ഥാനത്തുടനീളം 50 ഓളവും ടെഹറാൻ, സിംഗപൂർ, ഹോങ്കോങ്ങ് എന്നിവിടങ്ങളിലും ശാഖകൾ ഉണ്ട്. യൂക്കോ ബാങ്കുമായി ധാരാണാപത്രം ഒപ്പ് വച്ചതിലൂടെ ഈ പദ്ധതിയിൻ കീഴിൽ 15 ധനകാര്യ സ്ഥാപനങ്ങളിലെ 4600 ഓളം ശാഖകളിലൂടെ പദ്ധതിയുടെ പ്രയോജനം ലഭിക്കും. പത്ത് ലക്ഷം രൂപ വരെയുള്ള വായ്പകൾ ഈടില്ലാതെ നൽകാൻ യൂക്കോ ബാങ്ക് തീരുമാനിച്ചിട്ടുണ്ട്. 30 ലക്ഷം രൂപ വരെയുള്ള പദ്ധതികൾക്ക് 15% വരെ മൂലധന സബ്‌സിഡിയും (പരമാവധി 3 ലക്ഷം രൂപ വരെ) കൃത്യമായ തിരിച്ചടവിന് 3% പലിശ സബ്‌സിഡിയും നൽകുന്നുണ്ട്. പദ്ധതിയിൻ കീഴിൽ ഇതുവരെ 800 ഓളം പേർ ഗുണഭോക്താക്കളായിട്ടുണ്ട്.