നടവയൽ: ലൈഫ് പദ്ധതിയിലൂടെ സാധാരണക്കാരന്റെ വീടെന്ന സ്വപ്നമാണ് നിറവേറിയതെന്ന് തുറമുഖം, പുരാവസ്തു വകുപ്പ് മന്ത്രി കടന്നപ്പള്ളി രാമചന്ദ്രൻ പറഞ്ഞു. പനമരം ബ്ലോക്ക് പഞ്ചായത്ത് ലൈഫ് മിഷൻ ഗുണഭോക്താക്കളുടെ കുടുംബ സംഗമവും അദാലത്തും ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം.
ആയിരങ്ങൾക്ക് വീടെന്ന സ്വപ്നം പൂർത്തീകരിക്കാൻ ലൈഫ് പദ്ധതിയിലൂടെ സാധിച്ചു. പദ്ധതിയുടെ മൂന്നാം ഘട്ടത്തോടെ എല്ലാവർക്കും വീടൊരുങ്ങും. ജില്ലയിലെ പ്രധാന റോഡുകളുടെ വിപൂലീകരണ പ്രവർത്തനങ്ങൾ ഉടൻ പൂർത്തിയാക്കുമെന്നും മന്ത്രി പറഞ്ഞു.

നടവയൽ കെ.ജെ.എസ് ഓഡിറ്റോറിയത്തിൽ നടന്ന കുടുംബ സംഗമത്തിൽ സി.കെ.ശശീന്ദ്രൻ എം.എൽ.എ അദ്ധ്യക്ഷത വഹിച്ചു. ഒ.ആർ.കേളു എം.എൽ.എ, ജില്ലാ പഞ്ചായത്ത് പ്രസിഡന്റ് കെ.ബി. നസീമ, ബ്ലോക്ക് പഞ്ചായത്ത് പ്രസിഡന്റ് ടി.എസ്.ദിലീപ് കുമാർ,ദാരിദ്ര്യ ലഘൂകരണ വിഭാഗം പ്രൊജക്ട് ഡയറക്ടർ പി.സി. മജീദ്,ജോയിന്റ് പ്രോഗ്രാം കോർഡിനേറ്റർ പി.ജി.വിജയകുമാർ,ലൈഫ് മിഷൻ ജില്ലാ കോർഡിനേറ്റർ സിബി വർഗ്ഗീസ്,എ.ഡി.സി ജനറൽ നൈസി റഹ്മാൻ തുടങ്ങിയവർ പങ്കെടുത്തു. പനമരം ബ്ലോക്ക് പഞ്ചായത്തിന് കീഴിൽ ലൈഫ് പദ്ധതിക്ക് കീഴിൽ 2281 വീടുകളാണ് പൂർത്തീകരിച്ചത്.

സുൽത്താൻ ബത്തേരി എടത്തറ ഓഡിറ്റോറിയത്തിൽ നടന്ന ബ്ലോക്ക് പഞ്ചായത്ത് ലൈഫ് മിഷൻ ഗുണഭോക്താക്കളുടെ കുടുംബസംഗമം മന്ത്രി കടന്നപ്പള്ളി രാമചന്ദ്രൻ ഉദ്ഘാടനം ചെയ്തു. കൃഷി വകുപ്പിന്റെ വൃക്ഷത്തൈ വിതരണോദ്ഘാടനവും മന്ത്രി കടന്നപ്പള്ളി രാമചന്ദ്രൻ നിർവ്വഹിച്ചു. ബ്ലോക്ക് പഞ്ചായത്ത് പ്രസിഡന്റ് ലത ശശി അദ്ധ്യക്ഷത വഹിച്ച ചടങ്ങിൽ ജില്ലാ കലക്ടർ ഡോ. അദീല അബ്ദുള്ള, ലൈഫ് മിഷൻ ജില്ലാ കോർഡിനേറ്റർ സിബി വർഗ്ഗീസ്, ബ്ലോക്ക് പഞ്ചായത്ത് വൈസ് പ്രസിഡന്റ് സുരേഷ് താളൂർ, പഞ്ചായത്ത് പ്രസിഡന്റുമാരായ ബീനാ വിജയൻ, സീത വിജയൻ, കെ ശോഭൻകുമാർ തുടങ്ങിയവർ സംസാരിച്ചു. കുടുംബസംഗമത്തിന്റെ ഭാഗമായി താലൂക്ക് ആശുപത്രിയുടെ മെഡിക്കൽ ക്യാമ്പും കരുണ ഐ കെയറിന്റെ സൗജന്യ നേത്ര പരിശോധനാ ക്യാമ്പും ഒരുക്കിയിരുന്നു.

ബത്തേരി ബ്ലോക്ക് പഞ്ചായത്തിൽ 1625 വീടുകളുടെ നിർമ്മാണമാണ് പൂർത്തിയായത്. വിവിധ വകുപ്പുകളുടെ സേവനങ്ങളും ലഭ്യമാക്കിയിരുന്നു.